December 3, 2021

Rwandanews24

Publishing Factual, verified and accurate stories

Perezida Museveni agarutse mu muziki na Kanye West

YASUWE 55 

Perezida wa Uganda, Yoweri Kaguta Museveni arashaka kugaruka mu muziki, agakorana indirimbo n’abahanzi bakomeye ku ruhando mpuzamahanga.

Don Balaam Baruhagara ureberera inyungu z’uyu muhanzi (Museveni) yabwiye ikinyamakuru Blizz Uganda ko yanze kuzakorana na Chris Brown bitewe uburyo bw’imirimbire ye butamunyura.

” Ubu turimo gukorana na Kanye West ndetse na Lionel Litchie. Twashakaga gukorana na Chris Brown ariko Muzehe yarabyanze kubera ko ngo adakunda umuziki we n’uburyo awuririmbamo.” Balaam.

Repubulika Iharanira Demukarasi ya Congo ni igihugu kimaze igihe kinini gifite umuziki ukunzwe ku mugabane. Balaam ngo arimo kumvisha Museveni uburyo ari byiza gukorana indirimbo n’umuhanzi Kanda Bongo Man wo muri iki gihugu.

Kugaruka mu muziki kwa Museveni ni ukugira ngo yongere yigarurire imitima y’abaturage ba Uganda, cyane abakunzi b’umuziki. Umuziki ni na yo ntwaro Depite Robert Kyagulanyi (Bobi Wine) utavuga rumwe n’ubutegetsi bwa Uganda yifashishije akurura imitima y’urubyiruko rwinshi muri iki gihugu, mu gihe amatora y’umukuru w’igihugu azaba mu 2021, aba bombi bakaba baremeje guhatana.

Mu 2015 mbere y’amatora y’umukuru w’igihugu mu 2016, Museveni yasohoye indirimbo yise ’Ye Ngoma’. Iyo yakoze mu 2010 yayise ’Penkoni’. Izi ndirimbo zombi zumvikanamo amagambo nka ’you want another rap?’

Muri Uganda, umuziki na politiki birajyana kuko uruhande abahanzi nka Jose Chameleone na Bobi Wine babogamiyemo ruzana n’abandi bantu benshi. Ni ko byagenze no muri Kenya, aho umudepite Charles Njagua Kanyi uzwi nka Jaguar mu muziki yabonye uyu mwaka awukesha abayoboke be mu muziki.