December 6, 2021

Rwandanews24

Publishing Factual, verified and accurate stories

Uburundi ngo bugiye kwihorera ku ngabo zabwo zaguye mu gitero zagabweho n’inyeshyamba

YASUWE 65 

Imibare y’abasirikare b’Abarundi baba baherutse kugwa mu gitero cyo muri Komini Mabayi ikomeje kuzamuka, aho mu ijoro ryo kuri uyu wa gatatu ushize, abasirikare bavanye mu Ishyamba rya Kibira, imirambo umunani ya bagenzi babo bishwe mu ijoro ryo kuwa 16 rishyira kuwa 17 Ugushyingo 2019, mu gihe havugwa ko u Burundi bwaba buteganya kwihorera.

Ni igitero bivugwa ko cyagabwe ku birindiro bibiri by’Igisirikare cy’u Burundi (FDNB). Imibare ikaba yagaragaza mbere y’iyo mirambo ko hishwe abasirikare 9, abandi benshi bagakomereka ndetse abandi bakaburirwa irengero.

Nyuma yo kubona iyo mirambo yindi, umubare w’abasirikare bishwe wageze kuri 17, mu gihe abandi benshi bakomeretse, abandi bakaburirwa irengero nk’uko amakuru agera kuri SOSMediasBurundi avuga.

Ku wa gatatu  taliki ya 20 Ugushyingo 2019 ahagana saa 18:00 z’umugoroba, nibwo abaturage bo mu midugudu ya Kibande na Gitukura, muri Komini Mabayi, babonye ingabo z’u Burundi zitwaye imirambo 5, mu gihe mu gitondo bari babonye imirambo 3.

Iyi nkuru kandi ikomeza ivuga ko mu bantu baguye muri iki gitero harimo n’abasivili barimo Imbonerakure. Umwe mu Mbonerakure akaba yabwiye uru rubuga ko barimo kubona imirambo hirya no hino yatangiye kwangirika. Ati: “Baduhaye amabwiriza yo kuyishyingura aho ngaho. Bamwe ni insoresore z’Imbonerakure.”

Umwe mu basirikare bakuru b’u Burundi utifuje ko amazina ye atangazwa kubera ko atemerewe kuvugana n’itangazamakuru, we yatangaje ko bategereje umusada ngo bakore igisa nko kwihorera.

Abaturage ba Kibande bakaba bavuga ko bafite ubwoba nyuma yo kumara iminsi itatu batarara mu ngo zabo, bakibaza igihe bazasubirira mu buzima busanzwe

N’ ubwo iby’ iki gitero bikomeje kutavugwaho rumwe ku ruhande rw’ Uburindi n’abatavuga rumwe nabwo, Umutwe w’inyeshyamba udasanzwe umenyerewe mu matwi ya benshi, FRB-Abarundi niwo wigambye ko wagabye igitero kuwa 17 Ugushyingo 2019, ku birindiro by’ingabo z’u Burundi bikagwamo abatari bake.

Wagize uti “Umutwe FRB-ABARUNDI, uramenyesha Abarundi n’amahanga ko ari wo wateye ibirindiro byari i Mabayi-Marura byariho abasirikare ba FDN 112, interahamwe 30, Imbonerakure 18, bose hamwe bari 160. Hapfuye 38, hakomeretse bane, 18 bararokotse naho ababuze ni 100. Ingabo zacu ziri mu gihugu hagati.”

Ni mu gihe ubuyobozi bwa gisivili n’ubwa gisirikare bwahumurije abaturage buvuga ko umutekano wakajijwe ku mupaka w’u Burundi n’u Rwanda, bavuga ko abateye ari ho baturutse n’ubwo u Rwanda rwabiteye utwatsi.