December 1, 2021

Rwandanews24

Publishing Factual, verified and accurate stories

DRC: Dr Denis Mukwege yasabye ko hakoherezwa ingabo zidasanzwe z’ Ubufaransa muri Beni kuko FARDC na MONUSCO bananiwe

YASUWE 52 

Dr Denis Mukwege, Umunyekongo uherutse guhabwa igihembo cya Prix Nobel cyo guharanira Amahoro (Le prix Nobel de la paix), arasaba Umuryango w’Ubumwe bw’u Burayi n’u Bufaransa by’umwihariko, kohereza ingabo kabuhariwe zo kurinda abaturage bo muri Beni icyo yise iterabwoba ribera muri aka karere kuva mu 2014.

Mu itangazo ryashyizwe ahagaragara kuri uyu wa gatatu, italiki 20 Ugushyingo 2019, Denis Mukwege avuga ko badashobora gukomeza kujya bihanganisha abaturage b’inzirakarengane muri Beni nta kintu bakoze.

Yahamagariye Umuryango Mpuzamahanga gukemura iki kibazo, ufata icyemezo cyo kohereza ingabo zidasanzwe muri Beni, mu rwego rwo gufasha ingabo za Congo n’iza Loni avuga ko zigaragaza intege nkeya.

Amakuru dukesha Radio Okapi  akomeza avuga, Dr Mukwege yakomeje avuga ko hakenewe ibikorwa bifatika byo guhagarika ibyaha by’intambara n’ibyibasira inyokomuntu bikorerwa muri Beni, nyamara habarizwa igisirikare cya Congo n’ingabo za Monusco.

Ati: “Niba Igisirikare cya Congo na Monusco batarashoboye gukemura ikibazo cyo muri Beni mu myaka itanu, ntidushobora gukomeza kurebera ibitihanganirwa ntacyo dukoze; ibikorwa by’iterabwoba bikorerwa abasivili, abagore bicwa, bakanikwa ku karubanda bambaye ubusa, abana bicwa, ishimuta, ibigo nderabuzima bisenywa, insengero zitwikwa..”

Akomeza avuga ko mu rwego rw’ubufatanye bwa kimuntu, basaba ko hoherezwa izindi ngabo zidasanzwe nk’izari muri “Opération Artémis”. Iyi operation yari igizwe n’ingabo zidasanzwe z’u Bufaransa ikaba yarigeze koherezwa muri Congo mu 2003 n’Umuryango w’Ubumwe bw’u Burayi, mu rwego rwo guhagarika intambara hagati y’abaturage muri Ituri.

Ingabo za FARDC

Iyi niyo Mukwege asanga ikenewe mu rwego rwo guhagarika ubugizi bwa nabi budasiba kujyana Beni mu cyunamo, nk’aho mu minsi 10 ishize havugwa abaturage 50 biciwe mu bikorwa byitirirwa inyeshyamba za ADF.

Sosiyete sivile kuri uyu wa gatatu taliki ya 20 Ugushyingo 2019 yatangaje ko abasaga 20 n’abana bari bamaze kuhasiga ubuzima.