December 1, 2021

Rwandanews24

Publishing Factual, verified and accurate stories

Ifoto y’Umunsi: Akanyamuneza k’abari n’abategarugori mu mpuzankano ya RDF

YASUWE 56 

Ku wa 10 Ugushyingo 2019, abagore b’abanyamuryango ba FPR Inkotanyi bagera ku bihumbi bibiri bahuriye i Rusororo muri Intare Arena mu Nama nkuru y’Urugaga rw’Abagore yize ku ngingo zitandukanye ziganisha ku kugira igihugu gitekanye.

Yitabiriwe n’abantu batandukanye barimo abayobozi mu nzego za leta, izabikorera ndetse n’abashinzwe umutekano bari bayitumiwemo.

Imwe mu mafoto yafashwe kuri uwo munsi, igaragaza abasirikare bane b’igitsina gore bafite akanyamuneza nyuma yo kuyisoza no guhabwa impanuro na Madamu Jeannette Kagame.

Ubwo Perezida wa Repubulika Paul Kagame yagezaga impanuro ku bofisiye bato 320 basoje amasomo ya Gisirikare ku wa 16 Ugushyingo 2019, yavuze ko kurinda umutekano w’igihugu n’abagituye ari umwuga mwiza, udateye ubwoba, ushimishije kandi ko kuwujyamo ari amahirwe atagira uko asa ku buryo na we yongeye guhitamo icyo yaba yahitamo kuba umusirikare.

Mu bofisiye 320 basoje amasomo n’amahugurwa mu Ishuri rya Gisirikare rya Gako, muri bo abakobwa 29 barimo umwe wize hanze y’u Rwanda.

Madamu Jeannette Kagame mu butumwa bwe yabwiye abagize Inama Nkuru y’Urugaga rw’Abagore rushamikiye kuri FPR Inkotanyi, guharanira kuzana impinduka mu gihugu no gukemura ibibazo bicyugarije umuryango Nyarwanda.

Yavuze ko hari ibitakabaye bidindira mu muryango Nyarwanda nyamara abagore bahari.

Yakomeje ati “Hari ibyiciro by’ubuzima bw’igihugu turimo nk’abagore kandi turi benshi, nyamara ugasanga hari gahunda zikidindira kandi duhari, hanyuma wakumva uko bikomeza kugaruka ukagira ngo ntawe ubishinzwe muri twe! Nk’abanyamuryango ba FPR by’umwihariko urugaga, twongere twibuke ko turi imboni z’umuryango aho dutuye, aho dukora n’ aho tuba.”

Iyi ni inama yari ifite inyanganyamatsiko igira iti ‘Abagore, duharanire umuryango ushoboye kandi utekanye’.

Inama Nkuru y’Urugaga nirwo rwego rukuru rw’abagore rushamikiye ku Muryango FPR Inkotanyi. Iyi nama iterana rimwe mu myaka ibiri, ikitabirwa n’inzego zitandukanye z’Urugaga ariko hakaba hatumirwa n’abandi baturutse mu zindi nzego zidashamikiye ku Rugaga nk’uko Igihe cyabyanditse.