December 3, 2021

Rwandanews24

Publishing Factual, verified and accurate stories

Uganda: Dr Kizza Besigye utavuga rumwe n’ubutegetsi yafunguwe gusa anenga cyane uko yari afashwe.

YASUWE 56 

 

Bwana Kizza Besigye umwe mu batavuga rumwe n’ubutegetsi bwa Uganda abinyujije ku rukuta rwe Twitter yemeje ko ubu yarekuwe nyuma yo gutabwa muri yombi ejo ku wa mbere akanafatwa nabi.

Bwana Besigye yavuze ko ameze neza ndetse ashimira abantu bamushyigikiye muri icyo gihe yamaze afunze, ariko avuga ko uko yari amerewe ari “ihohoterwa rikomeye ry’uburenganzira bwa muntu”.

Muri weekend ishize, Bwana Besigye yari yaherekeje umugore we Winnie Byanyima i Geneve aho yagiye gutangira imirimo mishya nk’umuyobozi w’ishami ry’umuryango w’abibumbye ryo kurwanya SIDA, UNAIDS nk’uko uyu muryango wabigaragaje ku mbuga nkoranyambaga.

Kizza Besigye wigeze kuba umuganga bwite wa Perezida Museveni, yahise agaruka muri Uganda gukomeza ibikorwa bye bya politiki.

Polisi yataye muri yombi Bwana Besigye nyuma yo kumushinja guparika imodoka ye hagati mu muhanda akabangamira abandi bakoresha uwo muhanda wo mu murwa mukuru Kampala.

Ariko umwe mu banyamakuru bo muri Uganda yavuze ko Bwana Besigye – umukuru w’ishyaka Forum for Democratic Change (FDC) – yari mu nzira agiye kugeza ijambo ku mbaga y’abamushyigikiye ubwo polisi yamutaga muri yombi.

Ku mbuga nkoranyambaga, hacicikanye Videwo ndetse n’amafoto bigaragaza Bwana Besigye arundumurirwaho amazi menshi na polisi.

Videwo igaragaza Polisi imena ikirahuri cy’imbere cy’imodoka ye, ikamusohoramo igahita imutwara, nkuko byatangajwe n’ikinyamakuru Daily Monitor cyo muri Uganda kitegamiye kuri leta.

Mu kwezi kwa gatanu uyu mwaka, Bwana Besigye na Bobi Wine bemeje ko bishyize hamwe ngo bazahigike Perezida Yoweri Museveni, uri ku butegetsi guhera mu 1986.

Amatora ya perezida muri Uganda ateganyijwe kuba mu mwaka wa 2021.