November 27, 2021

Rwandanews24

Publishing Factual, verified and accurate stories

Gukora iperereza kuri Ingabire Victoire ni ukumwica mu mutwe-FDU-Inkingi

YASUWE 92 

Ishyaka ritavuga rumwe n’ubutegetsi mu Rwanda ryatangaje ko umuyobozi waryo Victoire Ingabire ukomeje gukorwaho iperereza ku bitero biheruka ku Rwanda arimo  gukorerwa “iyicarubozo mu bitekerezo”.

Mu ijoro ryo ku wa gatanu taliki 04 Ukwakira 2019, abantu bitwaje intwaro baturutse mu birunga batera mu Rwanda bica abaturage bagera kuri 14 mu karere ka Musanze banasahura ibyabo.

Kuva ku wa kabiri taliki 08 Ukwakira 2019, Madamu Victoire Ingabire uyobora ishyaka FDU-Inkingi yahamagajwe n’urwego rushinzwe iperereza ku byaha (RIB) ngo abazwe kuri ibi bitero.

Mu cyumweru gishize, Madamu Ingabire yabwiye BBC ko ntaho ahuriye n’ibitero byabaye ko we “urugamba arimo atari urw’amasasu, ahubwo ari urwa politike”.

Icyo gihe, umuvugizi w’urwego rw’ubugenzacyaha mu Rwanda yabwiye itangazamakuru mu Rwanda ko atavuga ibyo Madamu Ingabire arimo  kubazwaho kuko bikiri mu iperereza.

Mu myaka ishize ubwo yaburanaga ibyaha afunze, yahamijwe  gukorana n’umutwe wa FDLR urwanya ubutegetsi bw’u Rwanda ukorera muri DR Congo, ibyaha we yahakanye.

Ishyaka rye FDU-Inkingi, ritaremerwa n’amategeko mu Rwanda, ryasohoye itangazo rivuga ko Madamu Ingabire akomeje kubazwa, ariko bikorwa mu buryo bugamije “kumwica mu bitekerezo”.

Iri shyaka rivuga ko ejo taliki 15 Ukwakira 2019 yahamagajwe kujya kwicara kuri uru rwego rurimo kumubaza, nyamara ngo bazi neza ko umunyamategeko we adahari kandi atabazwa uyu umwunganira adahari.

Mu cyumweru gishize, Madamu Ingabire yitabye uru rwego inshuro enye, zimwe akahamara umwanya munini atabajijwe kuko umunyamategeko we adahari nk’uko uruhande rwe rubivuga.

Itangazo ry’iri shyaka rivuga ko ibazwa rye rikomeza uyu munsi ku wa gatatu taliki ya 16 Ukwakira 2019.

Rigira riti: “Ibi byose bikorwa biboneka ko bigamije kumwica mu bitekerezo, kumuca intege no kumukoza isoni”.

Kuva yarekurwa muri Nzeli 2018 ku mbabazi za Perezida wa Repubulika, Ingabire Victoire ategetswe kwitaba buri kwezi ibiro bimwegereye by’ubushinjacyaha.