December 1, 2021

Rwandanews24

Publishing Factual, verified and accurate stories

Umuyobozi wa Radio Amazing Grace yatawe muri yombi

YASUWE 220 

Polisi y’igihugu kuri uyu wa mbere taliki ya 7 Ukwakira 2019, yataye muri yombi Pasiteri Gregg Brian Schoof, Umunyamerika usanzwe ari umuyobozi mukuru wa Radio Amazing Grace (Ubuntu butangaje) itacyumvikanira mu Rwanda.

Uyu mugabo yafashwe na Polisi ubwo yari imbere y’abanyamakuru yari agiye kuganira na bo. Polisi y’igihugu ivuga ko uyu mugabo yatawe muri yombi azira kubuza ituze abaturage.

Muri Mata umwaka ushize wa 2018 ni bwo urwego rw’igihugu ngenzuramikorere RURA rwasheshe amasezerano ya Radiyo ubuntu butangaje yo gukorera ku butaka bw’u Rwanda.

Intandaro y’ihagarikwa ry’iyi radiyo yabaye inyigisho z’umuvugabutumwa Nicolas Niyibikora zahitishijwe kuri iyi radiyo ku wa 28 Mutarama 2018, imbaga y’Abanyarwanda bashoboye kumva icyo kiganiro igahamya ko cyibasiraga abagore ndetse kikanabandagaza.

Yerekaga abanyamakuru ko yahamagajwe na RIB ariko afite uburenganzira bwo gukoresha ikiganiro n’abanyamakuru

Inzego zitandukanye z’abagore zahise zishyira ikirego Urwego rw’Abanyamakuru Bigenzura (RMC) maze ubwo RMC yahuzaga impande zombi kuwa 12 Gashyantare 2018 zigaragaza ko koko iyi radio yatandukiye ikandagaza abagore.
RMC yahise isaba RURA guhagarika Radio Amazing Grace by’agateganyo mu gihe cy’amezi atatu.

Gusa, RURA imaze gusuzuma ubu busabe yafatiye iyi radio ibyemezo birimo gusaba imbabazi Abanyarwanda kuri radio, guhagarika iyi radio mu gihe cy’ukwezi kumwe ndetse inayica amande ya miliyoni ebyiri (2,000,000 FRW).

Mu kwezi kwa gatanu Bwana Schoof yatsinzwe ikirego nyuma yo kujurira mu rukiko rukuru ku ifungwa rya Radio ye.

Icyo gihe yabwiye abanyamakuru ko atanyuzwe n’umwanzuro w’urukiko, yongeraho ko “ubwisanzure bwo gutanga ibitekerezo bukwiye kurindwa nk’uko bikubiye mu Itegeko Nshinga ry’u Rwanda”.
Mu itangazo yahaye abanyamakuru mbere y’uko afatwa uyu munsi ryanditsemo ko yajuririye urukiko rw’ubujurire ariko hashize amezi atatu adasubizwa.

Yanditse ko agiye kuva mu Rwanda ariko “ashaka gusiga asobanuye neza ibyo bakorewe”.

Muri iri tangazo yasinyeho asobanura ko urwego rw’abanyamakuru (Rwanda Media Commission), urwego rugenzura imirimo imwe n’imwe mu Rwada (RURA) n’umukozi warwo witwa Tony Kuramba babahohoteye.

Uyu muvugabutumwa yanditse ko yibaza “niba guverinoma y’u Rwanda ishaka kujyana Abanyarwanda mu muriro”.

Ati: “Radio ya gikiristu yafunzwe mu buryo bunyuranye n’amategeko, insengero 7000 zarafunzwe,… abana mu mashuri bashishikarizwa gukoresha udukingirizo…”

We avuga ko ibi bidakwiriye ndetse akavuga ko abantu bose bakwiriye gusengera u Rwanda. Nyuma ubuyobozi bwa Radiyo Amazing Grace bwiyambaje ubutabera bugaragaza ko bwarenganijwe, gusa birangira itsinzwe urubanza.

Asoza iyi nyandiko ye ati: “Sinaje hano kurwanya leta, naje kuvuga ubutumwa, sinitaye kuri politiki, sinitaye kumenya ngo perezida ni inde cyangwa ishyaka riri ku butegetsi. Ariko iyi guverinoma yafashe inzira zirwanya Imana mu mikorere yayo”.

Ubutegetsi mu Rwanda ntacyo buratangaza ku bivugwa n’uyu Munyamerika.