December 7, 2021

Rwandanews24

Publishing Factual, verified and accurate stories

Musanze-Kinigi: Biracyekwa ko FDLR ariyo yagabye igitero gihitana abarenga 10 abandi barakomereka

YASUWE 56 

Mu ijoro ryo kuri uyu wa gatanu rishyira uyu wa gatandatu taliki ya 5 Ukwakira 2019 mu masaha ya saa yine z’ ijoro, abantu bataramenyekana bagabye igitero mu murenge wa Kinigi na Musanze mu tugari twa Bisoke na Kahugu, bakagenda barasa uwo bahuye nawe wese, abandi bakabatera ibyuma, abandi bakabatemagura, abagerageje guhamagara ngo batabaze nabo bicwaga.

Abaturage bavuga ko aka gatsiko k’abagizi ba nabi bashobora kuba ari inyeshyamba za FDLR kuko ngo baje babaza aho agasantere (centre) kitwa mu Kajagari gaherereye. Muri aka gasantere ko mu Kajagari gaherereye mu murenge wa Musanze, biravugwa ko aba bagizi ba nabi naho bahishe abantu 6, naho mu Kinigi bakaba bishe abantu 4, abandi bagakomereka.

Kugeza magingo aya, umubare w’abaguye muri ubu bugizi bwa nabi bwitwaje intwaro cyangwa ababukomerekeyemo, ntabwo uramenyekana neza, hakaba hategerejwe amakuru aributangwe n’inzego z’umutekano n’ubwo hari ibyo abaturage bamaze gutangaza.
Ugeze muri aka gace urahasanga ingabo z’igihugu RDF n’ibimodoka bya gisirikare, kugeza ubu hakaba hamaze kugaruka ituze.

Abaturage batuye muri utu tugari, batangaje ko aba bagizi ba nabi baturutse muri Pariki y’ibirunga. Abakomerekeye muri iki gitero bamaze kugezwa ku kigo nderabuzima cya Bisate, abakomeretse cyane bakaba bajyanywe ku butaro bya Ruhengeri. Abaturage bavuga ko babanje kumva urusaku rw’amasasu , ingabo z’Igihugu zirwana n’aba bateye, ariko ingabo z’igihugu zikabakubita inshuro bagahungira mu birunga kuko barwaniraga ku musozi wa Bisate, hafi ya Bisate Lodge.

Umunyamabanga Nshingwabikorwa umurenge wa Musanze Bwana w’Aloys Niyibizi hamwe mu habereye ubu bwicanyi yabwiye BBC ko abateye ari abantu bashakaga ibyo kurya.

Yagize ati: Aho bagiye gushaka ibiryo mu ngo z’abaturage hari abo bishe ntabwo turamenya ngo ni bangahe, ingabo kuko arizo zibirimo natwe turi kugendana nazo dutegereje ko batubwira uko bihagaze tugatanga amakuru yuzuye”.
Igisirikare cy’u Rwanda ntacyo kiratangaza ku byabaye mu karere ka Musanze.

Mu mwaka ushize muri aka gace k’ibirunga hagiye habera imirwano hagati y’ingabo z’u Rwanda n’inyeshyamba za FDLR zirwanya ubutegetsi bw’u Rwanda.