December 6, 2021

Rwandanews24

Publishing Factual, verified and accurate stories

Perezida Museveni yategetse ko inzererezi n’abanebwe batawe muri yombi barekurwa

YASUWE 63 

Agendeye ku itegeko ryo mu gihe cy’ubukoloni, Perezida Yoweri Kaguta Museveni wa Uganda yategetse ko abantu bose batawe muri yombi kubera imyitwarire y’ubunebwe no guteza akavuyo barekurwa.

Umukuru wa Polisi Martin Okoth Ochola yandikiye abakuru ba Polisi mu turere, abategeka gukurikiza iryo tegeko rya Perezida.
Mu cyegeranyo cyo mu mwaka wa 2016, umuryango utegamiye kuri Leta uharanira uburenganzira bwa muntu wa Human Rights Awareness and Promotion Forum, wavuze ko abo batawe muri yombi kubera amategeko ahana inzererezi yo mu gihe cy’ubukoloni bw’Abongereza. Ahanini ayo mategeko yibasiraga abakene badafite aho kuba hahoraho cyangwa badafite akazi.

Uwo muryango wongeyeho ko ubushakashatsi bwagaragaje ko abantu 958 batawe muri yombi hagendewe kuri ayo mategeko hagati ya 2011 na 2015, kuri sitasiyo eshanu za Polisi zakoreweho ubwo bushakashatsi.
Perezida Museveni yanategetse ko mu gihe kiri imbere nta muntu n’umwe wongera gutabwa muri yombi kubera ayo mategeko, nk’uko bitangazwa na Daily Monitor.

Ubu bubaye ubwa 3 Perezida Museveni atanze itegeko nk’iri, ubushize hakaba hari mu ijambo yagejeje ku baturage ba Uganda mu mwaka wa 2017.
Museveni yigeze gusezeranya gukuraho itegeko rigira icyaha gihanwa kuba umunebwe no guteza akavuyo, ariko iryo sezerano ntabwo ararisohoza.

Bwana Ochola yavuze ko Perezida Museveni yanategetse ko hafungurwa inzererezi zifungiye mu murwa mukuru Kampala kubera kunanirwa kwishyura amande angana na Miliyoni imwe y’amashilingi, angina na (250,000Frw) uvunje mu mafaranga y’ u Rwanda.
Ni nyuma y’aho bari bafashwe bacururiza mu mihanda mu buryo bunyuranyije n’amategeko.