November 27, 2021

Rwandanews24

Publishing Factual, verified and accurate stories

Aha ni ku isi si kuri Mars: Ikirere muri Indonesia cyahindutse umutuku- Amafoto

YASUWE 76 

Mu ntara imwe yo muri Indonesia muri Weekend ishize ikirere cyahindutse umutuku, ibi byavuye ku muriro wo mu mashyamba wateye imyotsi mu bice binini by’igihugu,ibi byatangajwe n’umuturage wifatiye amafoto abigaragaza neza.

Umwe mu baturage wo mu ntara ya Jambi wafashe amafoto y’ikirere avuga ko kureba mu kirere byaryanaga mu maso kandi bikababaza mu muhogo.

Buri mwaka imiriro y’ishyamba muri Indonesia iteza ibyotsi byinshi mu kirere cy’igice cyose cy’akarere k’iburasirazuba bwa Aziya y’epfo.

Nkuko tubikesha BBC Umuhanga mu by’ikirere yatangaje ko guhinduka kw’ikirere byatewe n’ibyo abahanga bita ‘Rayleigh scattering’.

Eka Wulandali wafashe aya mafoto yemeje neza ko ibi ari ukuri

Eka Wulandari wafashe amafoto y’uburyo ikirere cyari cyahindutse umutuku kuwa gatandatu saa sita z’amanywa avuga ko ibitangazamakuru byinshi byashidikanyije niba aya mafoto ari ay’ukuri.

Uyu mukobwa w’imyaka 21 yagize ati: “Ni amafoto na video nafashe na telephone yanjye, ni ay’ukuri”. Avuga ko ibi byakomeje kumera bitya kugeza kuwa mbere hamwe na hamwe.

Zuni Shofi Yatun Nisa undi muntu ukoresha Twitter yagaragaje amafoto nk’aya y’ikirere cyatukuye, yandikaho ati: “Aha si kuri Mars. Aha ni Jambi. Abantu dukeneye umwuka mwiza, ntidukeneye imyotsi”.

Professor Koh Tieh Yong wo muri kaminuza ya siyansi muri Singapore avuga ko ibyabaye biterwa n’ibinyabutabire bimwe bigize umwuka iyo bihuye n’ibihu bikomoka ku myotsi.

Avuga ko ibihu bikomoka ku myotsi hari urugero bigeraho byahura n’ibinyabutabire byo mu kirere bigakwiragiza ibara ry’umutuku kurusha iry’ubururu.

Ati: “Niyo mpamvu bariya bantu babonaga umutuku mu kirere aho kubona ubururu”.

Avuga ko kuba amafoto nayo yarafashe ku gicamunsi ku gihe cy’izuba biri mu byatumye arushaho kuboneka ari umutuku.

Ibyabaye uyu mwaka muri Indonesia ariko nibyo byari bikabije mu myaka yose. Ubusanzwe imiriro y’amashyamba muri iki gihugu iba mu kwezi kwa cumi bari mu gihe cy’izuba rikaze.

Mekar Sar mu ntara ya Jambi naho ikirere cyarahindutse

Ikigo gishinzwe ibiza muri iki gihugu kivuga ko hegitari 328,724 z’amashyamba zimaze gushya mu mezi umunani ashize.

Bivugwa ko gutwika amashyamba hari ubwo bikorwa n’abahinzi n’aborozi kugira ngo boroshye ibikorwa byabo.

Kubihagarika bisa n’ibyananiranye mu myaka ishize, bamwe bavuga ko biterwa n’intege nke z’ubutegetsi na ruswa.

Uku niko byari byifashe ahitwa Jambi muri Indonesia:

  

Byagiye bigabanuka gake gake gusa byari bikabije cyane