December 1, 2021

Rwandanews24

Publishing Factual, verified and accurate stories

Umwarimu wo muri Kenya wahize abandi ku isi yahuye na Donald Trump

YASUWE 60 

Peter Tabichi wo muri Kenya watowe nka mwarimu mwiza kurusha abandi ku isi mu ntangiriro z’uyu mwaka wa 2019, yahuye na Perezida Donald Trump wa Amerika mu biro bye White House.

Uyu mwarimu ari muri Amerika aho kandi azageza ijambo ku nama rusange y’umuryango w’abibumbye i New York muri uku kwezi kwa Nzeli 2019.

Tabichi ni umwarimu w’umufurere w’umufaransiskani, mu kwezi kwa gatatu uyu wamaka wa 2019 yatsindiye igihembo kitwa ‘2019 Global Teacher Prize’ gihabwa umwarimu wahize abandi ku isi.

Yigisha amasomo ya siyansi ku ishuri ryisumbuye rya Keriko mu gace ka Nakuru mu burengerazuba bwa Kenya.

Ifoto y’uyu mwarimu ari kumwe na Perezida Trump mu biro bye yashyizwe kuri Twitter n’umunyamabanga ushinzwe itangazamakuru w’ibiro bya perezida.

Uyu yanditse kandi ko “Furere Tabichi yatanze 80% by’umushahara we mu gufasha abakene iwabo muri Kenya nk’uko tubikesha AP.

“Ubwitange bwe no gukora cyane byatumye abanyeshuri be bo mu ishuri ridafite ubushobozi buhagije baba aba mbere mu irushanwa rya siyansi mu gihugu.

“Peter uri urugero rwiza kuri twese! Urakoze ku muhate wawe ku banyeshuri bawe”.

Ni ibyanditswe na Stephanie Grisham ushinzwe itangazamakuru muri White House.

Furere Tabichi w’imyaka 36, biteganyijwe ko azabwira inama rusange y’umuryango w’abibumbye uko yabashije kugera ku ntego ze mu mwuga we wo kwigisha.