December 7, 2021

Rwandanews24

Publishing Factual, verified and accurate stories

Col Tom Byabagamba arasaba urukiko kudafata ibyaha aregwa mu rwego rwa gisirikare

YASUWE 61 

Col Tom Byabagamba na Rtd Brig Gen Frank Rusagara bitabye Urukiko rw’Ubujurire  kuri uyu wa Kane taliki ya 12 Nzeli 2019, aho bakomeje kuburana ku bujurire batanze basaba kugabanyirizwa igifungo bakatiwe n’urukiko rwa Gisirikare.

Col Byabagamba yakatiwe gufungwa imyaka 21, nyuma yo guhamwa n’icyaha cyo gukwiza nkana ibihuha agomesha rubanda arwangisha ubutegetsi, icyaha cyo gusebya leta, icyaha cyo guhisha nkana ibintu byagombye gufasha kugenza icyaha gikomeye hamwe n’icyaha cyo gusuzugura ibendera ry’igihugu cyangwa ibimenyetso biranga ubwigenge.

Brig. Gen. Rusagara we yakatiwe gufungwa imyaka 20, amaze guhamwa no kwamamaza nkana ibihuha no kugomesha rubanda arwangisha ubutegetsi buriho, gukora igikorwa kigamije gusebya Leta ari Umuyobozi ndetse no gutunga imbunda binyuranije n’amategeko.

Muri Gicurasi 2019, bose bitabaje Urukiko rw’Ubujurire bagaragaza ko batanyuzwe n’icyemezo cy’Urukiko rwa Gisirikare rwabahamije ibi byaha mu 2016. Batangiye kuburana mu mizi ku wa 3 Nzeri 2019.

Mu iburanisha ryo kuri uyu wa 12 Nzeri 2019, ryatangiye ahagana saa tatu, umucamanza yatangiye yibutsa ababuranyi ko uyu munsi ari uwa nyuma w’iburanisha ndetse abajuriye n’ubushinjacyaha buri wese avuga mu ncamake ibikubiye mu bujurire.

Col Byabagamba yahawe umwanya atangira abwira Urukiko ko n’ubwo ahagaze imbere yarwo ari umusirikare, ariko ibyaha aregwa ari ibyaregwa buri Munyarwanda wese.

Yavuze ko Urukiko rudakwiye kubireba mu buryo bwa Gisirikare kuko mu byaha aregwa hatarimo gukoresha intwaro.

Yifashishije umugani w’umuntu wari uturanye n’undi atunze intama, undi afite imbwa maze umunsi umwe intama irabura ya mbwa ijya guta umwanda ku irembo rye maze avuga ko na we yatangiye kujya mu kaga ubwo mukuru we David Himbara yatorokaga igihugu.

Mu bisobanuro bye yavuze ko habayeho imikoranire y’Urukiko rwa Gisirikare n’Ubushinjacyaha ku buryo kugira ngo afungwe byari byarateguwe ngo n’icyemezo cyo kumufunga cyari cyarafashwe.

Yagize ati “Niho njye mpera nkavuga nti nk’igihugu dufite ikibazo gikomeye, ari nayo mpamvu ntangira kujurira nahereye aho ibintu bishingiye, aho nta handi ni ku Itegeko Nshinga kuko iyo ryirengagijwe nta kindi kiba gisigaye.’’

Yavuze ko ingingo zirengagijwe harimo kuba baragiye gusaka urugo rwe kandi we adahari, afunzwe.

Yabwiye abacamanza ko niba umuntu ahagaze imbere yabo akababwira ko umuryango we wavogerewe ugahohoterwa na bo bakwiye kugira icyo bumvamo nk’abantu kuko bagira ikibazo gikomeye biramutse bibaye ku miryango yabo.

Yavuze ko aregwa kwangisha abaturage leta, ariko kuri we ngo ibibangisha leta ni ibyaha avuga ko bitariho.

Icyo gutunga imbunda yavuze ko umunsi Kabayiza [uyu yararekuwe ndetse akurwa muri dosiye] yamuzaniraga ikarito ibikwamo imbunda yayimwatse akayibika ariko ngo yari aziko harimo imbunda imwe kuko n’ubundi agakarito kagenewe kubikwamo imwe.

Yabwiye Urukiko ko bamukoresheje inyandiko mvugo atazi ko muri ako gakarito harimo imbunda ebyiri.  Icyo gusuzugura ibendera yavuze ko bakimuregesheje itegeko ritakibaho.

Ati “Ntabwo numva ko Urukiko ruhindurwa St Michael rukemera ibyo rutabonye kandi rugendera ku bimenyetso. Sinumva ko Urukiko rwakora nk’ibyakozwe n’Urukiko rwa Gisirikare.’’ Urubanza rurakomeje