December 1, 2021

Rwandanews24

Publishing Factual, verified and accurate stories

Didier Drogba ategerejwe mu Rwanda muri YouthConnekt Africa Summit 2019

YASUWE 114 

Umunya-Côte d’Ivoire Didier Yves Drogba Tébily umwe mu bihangange mu mupira w’amaguru Africa ifite ategerejwe i Kigali mu nama ya YouthConnekt, iteganyijwe kuzaba ku wa 9-11 Ukwakira 2019.

Didier Drogba kuri ubu ufite imyaka 41 yavukiye I Abidjan muri Cote d’Ivoir, yakiniye ikipe y’igihugu ya Cote d’Ivoir anayibera Kapiteni, akaba yaramenyekanye cyane ubwo yakinaga mu ikipe ya Chelsea aho yakoreye amateka menshi yamuranze mu mupira w’amaguru.

Drogba kandi yabaye umukinnyi w’umwaka muri Afurika inshuro ebyiri zitandukanye, hagati ya 2006 na 2009.

Drogba azitabira iyi nama ya YouthConnekt 2019 nk’intumwa y’Ishami ry’Umuryango w’Abibumbye ryita ku iterambere(UNDP) ubusanzwe abereye Ambasaderi mu bikorwa bitandukanye.

Taliki 24 Mutarama 2007 nibwo Drogba yagiriwe ikizere na UNDP agirwa Ambasaderi wayo nyuma yo kugaragaza ibikorwa byiza byo gufasha yifitemo, yatoranyijwe nk’umuntu uzwi cyane ushobora kugira icyo afasha ku bibazo bya Afrika cyane cyane akoresheje izina rye yanditse.

Drogba yatanze akayabo ka miliyoni £3 nk’inkunga mu kubaka ibitaro mu mujyi wa Abidjan akomokamo  binyujije mu mushinga we witwa Didier Drogba Foundation, mu bushobozi afite Drogba yagiye akora ibikorwa byinshi bigaragaza umutima ufasha kandi bifitiye akamaro umubare munini w’abantu henshi hatandukanye ku isi.

Inama ya YouthConnekt ihuriza hamwe urubyiruko ruturutse mu bihugu bitandukanye muri Afurika, hakaganirwa ku nsanganyamatsiko zinyuranye. Muri uyu mwaka hazaganirwa ku iterambere ry’urubyiruko mu bijyanye n’inganda.

Muri izi nama kandi hifashishwa abantu batandukanye bafite aho bageze bakaganira n’urubyiruko. Inama nk’iyi yabaye muri Nyakanga 2017 yitabiriwe n’umuhanzi Akon n’umunyemari ukomeye w’Umushinwa Jack Ma.