December 7, 2021

Rwandanews24

Publishing Factual, verified and accurate stories

Tanzaniya batangiye icyunamo cy’iminsi 3

YASUWE 74 

Umukuru w’igihugu cya Tanzania John Pombe Magufuli yatangaje icyunamo cy’iminsi itatu mu gihugu cyose kuva ejo kuwa gatandatu taliki ya 10 Kanama 2019, inyuma y’aho abantu barenga 60 baguye mu mpanuka y’imodoka itwara ibikomoka kuri peterori.

Muri icyo cyunamo cyose, amabendera azururutswa kugera hagati.

Mugitondo cyo kuri iki cyumweru taliki ya 11 Kanama 2019, Minisitiri w’intebe wa Tanzania, Kassim Majaaliwa ari kumwe n’abandi bategetsi n’abandi basanzwe baba mu gace ka  Morogoro ahabereye iyo mpanuka, bazindukiye mu kibuga cy’ishuri ryisumbuye rya Morogoro gusezera bwa nyuma abahitanywe n’iyi mpanuka.

Kuzimya byabaye iby’ubusa abantu barakongoka

Biteganijwe  ko abenshi mu bahitanywe n’iyo mpanuka bashyingurwa kuri iki cyumweru.

Abarenga 70 bakomerekeye mu mpanuka barimo baravurirwa mu bitaro bikuru by’intara ya Morogoro, abandi mu bitaro bikuru by’igihugu biri i Muhimbili mu mujyi wa Dar es Salaam.

Icyateye iyo mpanuka

Iyo kamyo yari yuzuye risansi yahirimye igihe  umushoferi wayo yari  arimo agerageza gukwepa moto.

Abenshi mu bahasize ubuzima ni abari barimo bagerageza kuvoma risansi iyo kamyo imaze guhirima.

Abategetsi ntibavuga iyo nkongi y’ umuriro yatangiye, ariko umwe mu babonye ibyabaye yabwiye BBC ati:  “Njyewe nabonye umuhungu umwe yari arimo gufungura bateri y’iyo kamyo ashaka kuyiba. Mbibonye njyewe nahise niruka. Ubwo uwo muhungu amanuye  iyo bateri, niho umuriro wahise utangira kwaka. Abari bafite amabido yuzuye risansi  bahise biruka bakwira imishwaro, ariko umuriro wabafashe kuko wagenda uguruka cyane”.

Sibwo bwa mbere amasanganya y’ inkongi y’ umiriro nk’iyo ihitana abantu mu karere ka Afrika y’Uburasirazuba no hagati, ndetse no mu bindi bice bya Afrika, barimo bagerageza kuvoma risansi.

Izi ni moto z’abamotari zahiriye muri iyi nkongi

Mu mwaka wa 2009, abantu 90 barahiye baratokombera mu isanganya nk’iryo ryabereye mu gace ka Sachangwan kari mu ntara ya Rift Valley muri Kenya. Mu mwaka wa 2010 abandi 292 barapfuye mu gihugu cya Repubulika y’Intwaro Rusangi ya Kongo, hashize imyaka itanu indi sanganya ihitana abantu 203 muri Sudani y’Amajyepfo.

Mu bindi bice bya Afrika, abagera kuri 45 baherutse guhitanwa n’ikamyo yaturitse itwaye risansi mu kwezi kwa Nyakanga2019 mu karere ka Benue muri Nijeriya. Hari hashize amezi abiri abagera kuri 80 bahitanywe n’isanganya nk’iyo mu murwa mukuru wa Niger, Niamey, hari mu kwezi kwa gatanu uyu mwaka wa 2019.