December 1, 2021

Rwandanews24

Publishing Factual, verified and accurate stories

Arabia Saudite yavuze ko itazaha Abanyekongo VISA ngo bajye I Mecca

YASUWE 68 

Arabia Saudite yafashe icyemezo cyo kutazatanga impushya zo kwinjira muri icyo gihugu ku baturuka muri Republika ya Demokarasi ya Congo bajya mu mutambagiro mutagatifu.

Itangazo ryaturutse muri Minisiteri y’Ububanyi n’Amahanga ya Arabia Saudite, riravuga  ko ingingo  yo kutemerera abanye Congo kujya i Mecca, yaturutse ku cyemezo giherutse  gufatwa n’ishami rya ONU rishinzwe uburenganzira bwa muntu ku isi OMS, ko icyorezo cya Ebola cyahadutse ari ikibazo giteye impungenge ku isi yose.

Muri minisiteri y’ ububanyi n’amahanga  ya Arabia Saudite bagira bati:

“Gutanga impushya zo kwinjira bita visa, ku banye Congo byahagaritswe, mu rwego rwo kurinda abandi bari mu rugendo rutagatifu”.

Arabia Saudite yari yamenyesheje ubwa mbere ko abantu bagera kuri 410 baturuka muri icyo gihugu bashobora kujya mu rugendo rutagatifu, nk’uko umwe mu bategetsi b’idini rya Islamu muri Congo yabibwiye BBC.

Yavuze ko hari abantu bamaze igihe bitegura, akenshi bashobora kumara n’imyaka 10, kugira bashobore kwegeranya amadorari 4,250 abashoboza gukora urwo rugendo rutagatifu.

OMS yatangaje ko icyorezo cya Ebola ari ikibazo giteye inkeke ku rwego mpuzamahanga kuva ku italiki 17 z’uku kwezi kwa Nyakanga 2019, ariko isaba ibihugu kudahita bifata umwanzuro wo gufunga imipaka.