December 1, 2021

Rwandanews24

Publishing Factual, verified and accurate stories

Ishyirahamwe ryambutsa abimukira ryongeye gukora

YASUWE 206 

Ishyirahamwe ry’abagiraneza ritabara abimukira bahura n’ibibazo mu nyanja, SOS Méditerranée  ryongeye gukorera hafi y’inkengero za Libya n’ubwato bushyasha nyuma y’aho ryari ryahagaritswe  n’amaleta y’ u Burayi.

Ubwato bushyasha bw’iryo shyirahamwe bwitwa Ocean Viking, burimo ibendera ry’igihugu cya Norvege.  Abantu 31 babukoramo barimo abaganga icyenda bo mu ishyirahamwe bikorana, Medecins Sans Frontières (MSF).

SOS Méditerranée ryahagaritse ibikorwa by’ubwato bwa mbere bwitwa Aquarius, bumaze kwangirwa kwinjira mu Butariyani.  Ibihumbi by’abimukira bagerageza kwambuka  ikiyaga Mediterane bashaka kujya i Burayi buri mwaka, kandi Libya niho hantu h’ingenzi bahagurukira.

Abafata urwo rugendo kenshi bagenda nabi mu bwato bubi cyane kandi bwuzuye ku buryo benshi bapfira munzira batagezeyo.  Ariko kuva hagati y’umwaka wa 2017, umubare w’abimukira bafata urwo rugendo waragabanutse.

Kugabanuka kwabo byatewe ahanini n’ukwigora kwa leta y’Ubutaliyani hamwe n’ibindi bihugu by’ i Buraya byihanangirije  Libya kubuza abimukira kwambuka  Mediterane,  ariko iyo ngingo yamaganywe n’amashyirahamwe aharanira  uburenganzira bwa muntu.

Abimukira bafata urugendo rw’amazi kenshi bagenda mu bwato bubi kandi bwuzuye cyane

Uwafashije gushinga ishyirahamwe SOS Méditerranée, Sophie Beau, yatangaje ko nta bwato bwo gutabara na bumwe kuri ubu bukorera muri ako karere, kandi amashyirahamwe y’abagiraneza nta kundi yari kubigenza.

Yakomeje agira ati: “Twatangije SOS Méditerranée mu 2015. Kuva icyo gihe twashoboye gutabara abantu 30.000 ariko hari abandi benshi batabawe n’ayandi mato, harimo n’aya gisirikare nk’uko lemonde yabyanditse.

“Ariko kuri ubu ni nk’aho nta batabazi bahari. Rero twebwe nk’abasivile, dukora ibyo dushoboye iyo amaleta yananiwe. Ntibihagije ariko tugerageza  kubikora, kandi turabikora tukabikora neza .”

Yongeyeho y’uko amategeko mpuzamahanga  agenga inzuzi ashyigikiye igikorwa cyabo ku ngingo y’uko gukiza ubuzima bw’abantu birenze  amahame ya politike.

Muri Mutarama 2019, icyegeranyo cya ONU cyavuze ko abimukira batandatu bapfaga buri munsi bagerageza kwambuka Mediterane mu 2018.

Ishyirahamwe mpuzamahanga rishinzwe abimukira rivuga ko nibura abantu 426 bapfuye muri uyu  mwaka wa 2019 bagerageza kwambuka Mediterane.