December 1, 2021

Rwandanews24

Publishing Factual, verified and accurate stories

Ubwato bwa Amerika bwahanuye indege ya Irani

YASUWE 60 

Umukuru wa Leta Zunze Ubumwe za Amerika Donald Trump yatangaje ko igisirikare cye kirwanira mu mazi cyahanuye indege ya Irani mu cyanya cya Hormuz (Détroit d’Ormuz).

Avuga ko ubwato bw’intambara, USS Boxer “bwakoze igitero cyo kwikingira” ku wa kane taliki ya 19 Nyakanga 2019, nyuma y’aho iyo drone yari igeze hafi kuri metero 914 yabwo.

Irani ivuga ko nta makuru ifite ko hari drone yabuze

Mu ijambo yavugiye mu biro bye Maison Blanche, Bwana Trump yagize ati: “Ndashaka kumenyesha uwo ari we wese ko hari igitero cyabaye uyu munsi cyakozwe n’ubwato bw’intambara, USS Boxer.

“Ubwo bwato bwakoze igitero cyo kwihimura kuri drone ya Irani yari yabusatiriye cyane, iri hafi kuri metero 914, yirengagije akamo yatewe ko gusubira inyuma, ibyabangamiye umutekano w’ubwo bwato n’abari muri bwo. Iyo drone yahise ihanurwa ubwo”.

“Ako niko gasomborotso (agasuzuguro) gaherutse gakozwe na Irani ku bwato buri mu mazi mpuzamahanga. Amerika ifite uburenganzira bwo kurinda abantu bacu, n’inyungu zacu”.

Mbere y’aho, Irani yari yamenyesheje ko yafashe “ubwato mvamahanga butwara igitoro” n’abari muri bwo 12 ku cyumweru taliki ya 15 Nyakanga 2019, ikabushinja ko bwari butwaye igitoro (ibikomoka kuri peterori) cya magendu.

Amerika ivuga ko igihugu cya Irani kigomba kurekura ubwo bwato

Ibitangazamakuru bya leta ya Irani byasubiyemo amagambo yatangajwe n’ishami rya gisirikare rishinzwe kubahiriza idini rya Isilamu, rivuga ko ubwo bwato bwari butwaye igitoro cya magendu kingana na litiro miliyoni.

Ibyo binyamakuru  byerekanye ireresi y’utwato dutoya tunyaruka cyane twa Irani tuzenguruka ubwo bwato Riah bwari bufite idarapo ry’igihugu cya Panama.

Irani ivuga ko ubwo bwato bwafatiwe mu izinga rya Larak riri mu Majyepfo y’icyo gihugu.

Amerika irashinja icyo gihugu ko gikora ibitero ku mato atwara igitoro kuva muri Gicurasi 2019 muri ako karere, ibyo Irani yamaganira kure.

Ukutumvikana hagati y’ibyo bihugu byompi kwatangiye muri Gicurasi mwaka ushize wa 2018.

Icyo gihe Trump yivumbura mu masezerano yo mu mwaka wa 2015 hagati ya Irani n’ibihugu bitandatu bya rutura, ku byerekeye umugambi wayo wo gucura ibitwaro by’ubumara.

Ibintu byagiye kuba bibi kuva mukwa muri Kamena 2019, cyane cyane kuva aho Irani irasiye indege (drone) ya Amerika mu cyumweru gishize, ivuga ko yari yavogereye ikirere cyayo, ibyo Amerika yamaganye ivuga ko drone yayo yari iri mu kirere mpuzamahanga.