December 1, 2021

Rwandanews24

Publishing Factual, verified and accurate stories

Karongi: Ibaruwa Gitifu yandikiye umuyobozi w’isoko ntivugwaho rumwe n’abacuruzi

YASUWE 118 

Mu ntangiriro za Gashyantare 2021 ku itariki 02, nibwo Umunyamabanga nshingwabikorwa w’umurenge wa Bwishyura yandikiye ibaruwa Umuyobozi w’isoko rya Kibuye ibasaba ko barushaho kunoza imikoreshereze y’ubukarabiro bwubatswe n’akarere muri iri soko, iyi baruwa ntiyakiriwe neza n’abacuruzi barikoreramo, bavuze ko bi ari umutwaro Leta irikubagerekaho, wo kubakuramo amafaranga ku ngufu kandi ntayo baba bacuruje. Ubuyobozi bw’umurenge buvuga ko aba bacuruzi bakwiriye kumva ko ubukarabiro babwubakiwe ngo babukoreshe bazirikana ko aribo bagomba kwishakamo ibindi nkenerwa ngo bubashe gukora.

Bamwe mu bacuruzi baganiriye na Rwandanews24 bavuze ko batigeze bishimira na gato iyi baruwa, ndetse ko ubuyobozi bwagakwiriye kujya bwishyura umuriro ugendera ku mashini zashyizwe mu bukarabiro ngo amazi ajye yizana kuko zitwara umuriro mwinshi, nabo bakishakamo ayo kwishyura amazi n’isabune, kuko ntakintu baba bacuruje.

Umwe muribo utarifuje ko amazina yiwe atangazwa yagize ati “Twishyura inzu z’akarere dukoreramo nkuko bisabwa, nta bwiherero baduha turabwiyishyurira, twishyura imisoro ya Leta nkuko tubitegetswe, tukiyishyurira aba zamu bo kuturindira umutekano aho dukorera none muri ibyo byose nta mafaranga y’umuriro yavamo? twebwe bakatwatse ay’isabune  n’amazi gusa.”

Undi yagize ati “Mutubarize niba umurenge wa Bwishyura mu gihugu hose ari umwihariko aho twebwe nk’abacuruzi baciriritse batabona ko bagakwiriye no kudusonera imisoro kuko tutakibasha gucuruza nkuko byahoze, ahubwo bagakomeza kuduturaho ibidusoromamo amafaranga, ubuyobozi nibutuvuganire kuko ariya ntayo twazabasha kubona.”

Undi yagize ati “Biriya bimashini bituma amazi ahita yizana birya umuriro mwinshi, kuki batadushyiriyeho Vane nkiza robinet yo kuri gare uburyo bidatwara imiriro y’amashanyarazi, amafaranga yarabuze uraza ukirirwa wicaye ugataha ntamukiriya winjiye iwawe.”

Rwandanews24 twagerageje kuvugisha  Nzamwita Daniel, Umuyobozi w’Isoko rya Kibuye ku murongo wa terefone kubw’iyi baruwa yandikiwe maze aratwitaba tumusobanurira icyo tumushakira, yumvise ari umunyamakuru adusubiza ko adahari araza kutureba.

Ayabagabo Faustin, Umunyamabanga nshingwabikorwa w’umurenge wa Bwishyura wanditse iyi baruwa, avuga ko bayanditse bamenyesha ubuyobozi bw’isoko ko bukwiriye kugira uruhare mu kubungabunga isuku no gusigasira ubukarabiro bubakiwe n’akarere, babigizemo uruhare nk’abakoresha isoko, agashimangira ko bagiranye ibiganiro n’ubuyobozi bw’isoko ntibubashe kubagaragariza icyo kibazo nimba barahuye nacyo.

Ayabagabo Faustin ati “Twabashije kuganira n’ubuyobozi bw’isoko ariko ntabwo bwigeze butumenyesha izo mbogamizi abacuruzi bavuga bafite, kuko ubukarabiro babwubakiwe n’akarere nabo igisigaye ni uruhare rwabo nk’abarikoresha kuko abakiriya bakarabiraho baza aribo bagana.”

Abakorera mu isoko nibumve ko bahawe ubukarabiro bujyanye n’igihe ngo barusheho kwirinda icyorezo no kurinda ababagana.

Amakuru agera kuri rwandanews24 avuga ko muri iri soko rya Kibuye hari ubwo bamara iminsi 3 ubukarabiro bubakiwe n’akarere butagira amazi, kubera kwitana ba mwana kubagomba kugura umuriro, kandi ni isoko riganwa n’abaturage benshi, bamwe bakabyita imiyoborere idaha abaturage ijambo ngo bagire uruhare mu bibakorerwa aho bafatirwa imyanzuro nta ruhare bayigizemo, ibintu bisa nkaho ubuyobozi bw’isoko bubayoboza igitugu.

Isoko rya Kibuye riherereye mu karere ka Karongi, Umurenge wa Bwishyura, akagari ka Kibuye umudugudu wa Gatwaro, riherereye muri metero nkeya uvuye ku biro by’Umurenge wa Bwishyura.

Ibaruwa Gitifu yandikiye umuyobozi w’Isoko rya Kibuye ntivuggwaho rumwe n’abacuruzi

Ubukarabiro bwubatswe mu isoko rya Kibuye bujya bumara iminsi 2 cyanggwa 3 itatu budakoreshwa kubera ko habuze uwishyura umuriro bukoresha
Ibiro byumurenge wa Bwishyura, ari nawo wubatsemo isoko rya Kibuye