December 7, 2021

Rwandanews24

Publishing Factual, verified and accurate stories

Umwe mu bagabo bakora mu Bitaro bya Nyanza bakekwaho gusambanya umwana w’umukobwa arahigwa bukware

YASUWE 77 

Mu bitaro by’Akarere ka Nyanza haravugwa abagabo babiri basanzwe babikoramo isuku bakekwaho gusambanya umwana utaruzuza imyaka y’ubukure bamubeshye ko bamuboneye akazi, umwe yatawe muri yombi undi arashakishwa.

Amakuru yo gusambanywa uyu mwana w’umukobwa w’imyaka 16 y’amavuko utuye mu Karere ka Nyanza yamenyekanye ku wa 9 Gashyantare 2021 aho umwe mu bakozi bo mu bitaro yaje mu kazi mu gitondo agasanga umwana muto ari gukubura (umukozi  ukora amasuku ni we warubwiye uwo mwana ngo abe amukuburira), ariko agakubura arimo kurira hari n’abagore babiri bashungereye barimo kumuseka bamubaza uko mu gihe yari arimo gusambanywa yumvaga bimeze.

Uwakurikiranye aya makuru yabwiye avuga ko uwo mwana yageze mu bitaro  kumugoroba wo ku wa 8 Gashyantare 2021 anyura ku bitaro (hari umuhanda) abona umugabo witwa Musirikare Manasse amubaza niba yamurangira akazi ko mu rugo maze Manasse amubwira kuza mu Bitaro, ariko ko bucya mugitondo akamujyana aho bakeneye umukozi wo mu rugo.

Akomeza avuga ko umuzamu w’ibitaro yabonye uwo mwana akabaza Manasse ibye, Manase asubiza ko ari umwana we.

Nyuma mugicuku umuzamu yinjiye mu nzu bameseramo imyenda y’Ibitaro (bivugwa ko ariho yasambanyirijwe) asanga uwo mwana w’umukobwa aryamye hagati ya Minani na Manasse ntiyabitindaho kuko yari azi ko ari umwana uryamanye na Se.

Umuvugizi w’umusigire w’Urwego rw’Igihugu rw’Ubugenzacyaha (RIB), Dr. Murangira B.Thierry yemeje aya makuru  ko abo bagabo umwe muri bo yatawe muri yombi.

Ati “RIB yataye muri yombi umugabo witwa Minani w’imyaka 35 y’amavuko akekwaho gusambanya umwana w’umukobwa w’imyaka 16.”

Dr. Murangira yakomeje yibutsa abantu ko RIB itazihanganira na rimwe abantu bakora ibyaha bityo bakwiye gufatanya n’Abanyarwanda hakarindwa ibyaha by’umwihariko  ibyo gusambanya abana.

Amakuru avuga ko Minani Laurent w’imyaka 35 y’amavuko yatawe muri yombi afungiye kuri sitasiyo ya RIB ya Busasamana mu karere ka Nyanza.

Mugenzi we Musirikare Manasse w’imyaka 46 we aracyashakishwa kuko yacitse, bariya bagabo bombi (Minani na Manasse) basanzwe bakora isuku mu Bitaro by’Akarere ka Nyanza nk’uko Umuseke dukesha iyi nkuru wabyanditse.