December 1, 2021

Rwandanews24

Publishing Factual, verified and accurate stories

Gisagara: Yafatiwe mu cyuho arimo kugurisha moto yibye

YASUWE 68 

Polisi y’u Rwanda ikorera mu Karere ka Gisagara ku wa Mbere tatiki ya  8 Gashyantare 2021 yafashe moto ifite ibirango RE882Y yari yibwe uwitwa Mugenzi Mayisha ufite imyaka 21 wari usanzwe akora akazi ko gutwara abantu n’ibintu kuri Moto (motari).

Moto yafatanywe uwitwa Ntirandekura Egide ufite imyaka 29, afatirwa mu Murenge wa Gikonko mu Kagari ka Mbogo mu Mudugudu wa Bukorota.

Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire yavuze ko moto ya Mugenzi yibwe tariki ya 23 Mutarama 2021 ikuwe mu nzu aho yari aryamye asinziriye.

Yagize ati:  “Mugenzi yari aryamye,  mu ijoro rya tariki ya  23 Mutarama 2021, abyutse mu gitondo asanga bafunguye urugi batwara moto  aho akeka ko hakoreshejwe urufunguzo yari aherutse kubura. Nyuma yo kubura moto Mugenzi yahise abimenyesha Polisi ikorera muri Sitasiyo ya Gikonko itangira kuyishakisha.”

SP Kanamugire yavuze ko nyuma umuturage yatanze amakuru kuri Polisi ko hari umuturanyi we ushaka kumugurisha moto kandi azi neza  ko atayitunze.

Yagize ati: “Umuturage yatanze amakuru kuri Polisi ko Ntirandekura arimo kumugurisha moto kandi azi ko ntayo yari asanzwe atunze, ni ko guhita tujyayo dusanga ni ya moto yari yibwe twashakishaga.”

Mugenzi yashimiye Polisi y’u Rwanda ko idahwema gutabara abaturage mu gihe bayitabaje.

Yagize ati: “Ndashimira Polisi yacu ko idahwema kutuba hafi igihe tuyitabaje, nari nzi ko moto yanjye itazaboneka ariko ndashimira Polisi y’u Rwanda yayifashe ikaba iyinsubibije.”

SP Kanamugire yashimiye  umuturage watanze amakuru, asaba n’abandi gukomeza ubufatanye na Polisi mu kudahishira abanyabyaha, abasaba kujya  batangira amakuru ku gihe.

Ntirandekura yashyikirijwe Urwego rw’Igihugu rw’Ubugenzacyaha (RIB) rukorera muri Sitasiyo ya Polisi ya Gikonko kugira ngo hakorwe iperereza ku cyaha cy’ubujura acyekwaho.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 166, ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2), ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Ingingo ya 167 yo muri iri tegeko ivuga ko ibihano ku cyaha cyo kwiba byikuba kabiri (2) iyo kwiba byakozwe n’abantu barenze umwe, iyo kwiba byakozwe nijoro, iyo uwibye yakoresheje guca icyuho, kurira cyangwa yakoresheje igikoresho icyo ari cyo cyose gifungura aho utemerewe kwinjira.