December 1, 2021

Rwandanews24

Publishing Factual, verified and accurate stories

Umugabo wa Idamange upfobya Jenoside yitandukanyije na we IBUKA isaba ko akurikiranwa

YASUWE 71 

Idamange Iryamugwiza Yvonne uvuka mu Karere ka Kamonyi, hashize iminsi akoresha imbuga nkoranyambaga agatangaza amagambo arimo menshi agaragazwa nk’apfobya Jenoside yakorewe Abatutsi nk’aho yavuze ko imibiri y’abazize Jenoside iri mu nzibutso yabaye igicuruzwa.

Ni amagambo yatunguye benshi bazi uyu mugore w’abana bane ukomoka mu Karere ka Kamonyi warangirije amashuri yisumbuye i Musambira arihirwa n’Ikigega cy’Abarokotse Jenoside, FARG, akanakomeza Kaminuza akitabwaho.

Nyuma ya Jenoside yakorewe Abatutsi, Idamange yarezwe na mukuru we wamufashaga mu byo akeneye byose ariko amafaranga y’ishuri agatangwa na FARG. Arangije amashuri yisumbuye yahise ashaka umugabo, gusa nyuma baje gutandukana.

Abazi neza Idamange bavuga  ko yari abanye n’umugabo we mu buzima bwiza, gusa bamaze gutandukana, butangira kumugora kugeza n’aho rimwe na rimwe yavaga mu rugo rwe akajya kuba mu bandi bo mu muryango kubera kubura amikoro.

Umwe ati “Kuva yarangiza kwiga, ntabwo nzi akazi yigeze gukora, gusa wenda nk’umuntu wize ashobora gushaka ibiraka.”

Hari ababwiye IGIHE ko ubwo yari amaze gushyira hanze ibiganiro birimo imvugo zipfobya Jenoside, bamwe mu bo mu muryango we bamuvugishije akababwira ko ibyo yatangaje ari ibyo atekereza, ko nta kibazo na kimwe yigeze ahura nacyo.

Umugabo we yitandukanyije n’amagambo ye

Eng Mabumba Oswald, umugabo wa Idamange, asigaye aba muri Sudani y’Epfo. Yifashishije Instagram maze yamagana ibyatangajwe n’umugore we babyaranye kane.

Ati “Impamvu nanditse ibi ni ukumenyesha abantu bose ko umugore wanjye Yvonne aherutse kujya mu ruhame akanenga Guverinoma y’u Rwanda ku mbuga nkoranyambaga, ibi ni ibintu namagana nivuye inyuma. Nk’umugabo n’umubyeyi w’abana be, nagerageje kumugira inama ku rwego rw’umuryango ku nzira mbi ari guhitamo ariko ntiyigeze yakira inama zanjye.”

Mabumba yavuze ko ibyo yavuze ari amagambo ye ku giti cye ko we n’abana ari abaturage bakunda u Rwanda batari kumwe na we mu murongo yafashe.

Akiga yari umukobwa ucecetse

Perezida wa IBUKA mu Karere ka Kamonyi, Murenzi Pacifique, yabwiye IGIHE ko yize ku kigo kimwe na Idamange nubwo uyu mugore yari mukuru ari imbere ye ho imyaka ibiri kuri Ecosse Musambira.

Ati “Wabonaga ari umwana w’umukobwa ucecetse, ntabwo yajyaga akunda kuvuga ibintu bye, ariko niba ari n’ibibazo by’ihungabana, yakundaga kubigira ku ishuri ariko igikomeye we ntabwo wabonaga ashaka kuvuga, ni nayo mpamvu tubonye biriya twagize ikibazo, tukavuga tuti ni Idamange uri kuvuga ibi cyangwa ni undi kuko we yahoraga ari umuntu witurije.”

Murenzi yakomeje avuga ko nyuma yo gushaka, Idamange yitabiraga ibikorwa byo kwibuka mu Karere ka Kamonyi, kandi ukabona ari umuntu utuje ari nabyo byatumye benshi bibaza icyamuteye,

Ati “Yaba ari Umuryango we, abavandimwe be, mu by’ukuri twaravuganye, ariko bababajwe n’amagambo yavuzwe n’umuvandimwe wabo […] abarokotse jenoside nabo bababajwe n’ibyo yavuze, mu by’ukuri ari abavandimwe be uko bamuzi, ntabwo bumva ko ariwe uri kuvuga biriya bintu, bose twaravuganye.”

“N’inshuti ze iyo zimuhamagaye ntabwo ashaka kugira amakuru abatangariza ahubwo baba bumva ko umuntu wese umuhamagaye agiye kumwita umusazi, ni nk’aho yakakubwiye ati njye ibyo uri kumbaza ntaho bihuriye n’uko uri kubitekereza.”

“Uwarokotse Jenoside uyipfobya, arusha ubugome abayikoze”

Umunyamabanga Nshingwabikorwa wa Komisiyo y’Igihugu yo kurwanya Jenoside, CNLG, Dr Bizimana Jean Damascène, aherutse kubwira itangazamakuru ko ibyo uyu mugore yavuze byerekana ipfobya mu magambo ye.

Ati “ Nk’aho avuga ko Coronavirus ari iturufu igihugu gikoresha nk’uko Jenoside yakorewe Abatutsi ari iturufu ndetse akanongeraho ko imibiri y’abatutsi bishwe muri Jenoside iri ku nzibutso icuruzwa igihugu kikavanamo amadovize ngo abarokotse Jenoside babayeho nabi.”

Yakomeje agira ati “Coronavirus ntabwo ari iturufu, aya ni amagambo yagiye avugwa kuva Jenoside ikimara guhagarikwa n’abantu bapfobya, banahakana Jenoside yakorewe Abatutsi [….] ushaka wese gutesha agaciro Jenoside yakorewe Abatutsi avuga ko ari iturufu.”

Dr Bizimana yavuze ko kuba Idamange yapfobya Jenoside yakorewe Abatutsi, ntaho bihuriye no kuba yarayirokotse ndetse ko atari nawe wa mbere wayirokotse ugaragaye ayipfobya.

Ati “Uwo ariwe wese wapfobya Jenoside yakorewe Abatutsi agomba kubikurikiranwaho bidashingiye ku cyo aricyo”, gusa ngo umuntu warokotse Jenoside azi uburemere bwayo kurusha abandi bityo kuba yagera aho atesha agaciro abamurokoye, bimugira umuntu ufite ubugome kurusha n’abayikoze.

Ati “Umuntu warokotse Jenoside yakorewe Abatutsi, azi uburemere bwayo kurusha abandi bose, urengereye akajya kuyipfobya, akajya gutesha agaciro abamurokoye n’abamukijije uwo ku bwanjye ni ko mbyemera kandi ni ko bimeze, arusha rwose ubugome na ba bandi bayikoze. Uyipfobya abikora nyuma y’abayikoze, yarabonye ingaruka yateye, yarabonye uburemere ifite akaba ashaka ko n’iyo jenoside yongera gukora.”

IBUKA yasabye ko Idamange akurikiranwa

Umunyamabanga Nshingwabikorwa wa IBUKA, Naphtal Ahishakiye, yatangaje ko ibyo uyu mugore yavuze, ari ibyaha bihanwa n’amategeko y’u Rwanda kandi ko ari ibintu bibabaje kubona umuntu warokotse Jenoside yakorewe Abatutsi, ariwe uhindukiye akajya kuyipfobya.

Ati “ Ni ibyaha bihanwa n’amategeko, harimo amagambo apfobya Jenoside avuga ko Jenoside ari igicuruzwa kandi mu by’ukuri kuva Jenoside yahagarikwa, Leta y’Ubumwe natwe twese tubungabunga ibimenyetso bya Jenoside nk’imfashanyigisho idufasha gukumira ikintu cyose cyasubiza abanyarwanda inyuma.”

“Ntabwo Jenoside yigeze iba igicuruzwa. Ikindi ni aho usanga yibasira gahunda za leta y’ubumwe, asebya inzego z’ubuyobozi, agumura abaturage. Ni ibintu bibabaje kubona umuntu uzi agaciro ka leta y’ubumwe, ni ibintu bidakwiriye. Igikwiriye gukorwa, ni uko uriya muntu akwiriye gushyikirizwa ubutabera, akisobanura.”

Hari bamwe mu bazi neza Idamange babuze uko bakira amagambo yavuze, kuri bo batekereza ko ashobora kuba yararwaye indwara zo mu mutwe ku buryo yisanga yagiye ku ruhande rw’abamuhemukiye.

Ntibyaba ari uburwayi bwo mu mutwe?

Abahanga mu bijyanye n’ubuzima bwo mu mutwe, basobanura ko iyo umuntu wakorewe icyaha runaka ageze igihe akumva ari ku ruhande rw’abamugiriye nabi, aba arwaye indwara yo mu mutwe izwi nka “Stockholm syndrome”.

Umwe mu baganiriye na IGIHE yavuze ko bidashoboka ko ari uburwayi bwo mu mutwe Idamange afite ngo kuko imiterere y’ibyo avuga bigaragaza neza ko ari nk’ibintu byamucengeye aho kuba ari ingaruka z’ubuzima yanyuzemo.

Ati “ Buriya ihungabana rifatwa ukwinshi, ariko urebye ibintu bye bigaragara ko aba yabiteguye, biba biteguye. Uwacitse ku icumu ashobora guhungabana akavuga ibi na biriya, wararokotse Jenoside wajya kuvuga ireme ry’uburezi ngo wahungabanye?” Ubu ko ntacyo abantu bavugaga barahejwe mu mashuri?”

“Habaho ibintu umuntu avuga ukabisanisha na Jenoside, agahungabana kuko atagira icumbi ukavuga uti wenda byashoboka ukagira uko ugoragoza ukabihuza. Kujya kuvuga ireme ry’uburezi, kujya kuvuga Guma mu Rugo ireba abanyarwanda, umuntu umwe udafite umunyarwanda wamutumye, niho usanga bitereye ikibazo. Buriya habaho ibintu umuntu yavuga ugacishiriza ukabihuza n’ihungabana, ugasanga nk’umuntu muri Guma mu Rugo aravuze ngo ubuse ko tubujijwe kwibuka, aho wabihuza wenda ariko aha ntibishoboka.”

Umunyamabanga Nshingwabikorwa wa IBUKA, Naphtal Ahishakiye, yasabye abanyarwanda bose n’abarokotse Jenoside kwirinda kurangazwa n’imitekerereze ya Idamange cyangwa undi umeze nkawe.

Amategeko asobanura gupfobya jenoside nk’imyitwarire iyo ari yo yose igambiriwe kandi igaragajwe mu ruhame mu buryo ubwo ari bwo bwose, igamije kugabanya uburemere cyangwa ingaruka ya jenoside no koroshya uburyo jenoside yakozwemo.

Abo mu muryango wa Idamange bose batunguwe n’amagambo ye 
Umugabo wa Idamange yamaganye amagambo yatangajwe n’umugore we 
Yavuze ko yagerageje kumugira inama ariko undi akanga kumwumva 
Murenzi Pacifique yize ku kigo kimwe na Idamange, yavuze ko yari umukobwa udakunda kuvuga