December 7, 2021

Rwandanews24

Publishing Factual, verified and accurate stories

Gatsibo: Umuyobozi w’ikigo cy’amashuri yatawe muri yombi akurikiranyweho gusambanya umwana

YASUWE 88 

Umuyobozi w’Ikigo cy’amashuri cya Nyakayaga Nyakayaga Secondary School Baziga Emmanuel giherereye mu Mudugudu wa Rwagitima, Akagari ka Bukomane mu Murenge wa Gitoki mu karere ka Gatsibo yatawe muri yombi akurikiranyweho icyaha cyo gusambanya umwana w’umunyeshuri wiga kuri iki kigo ayobora.

Umwe mu babyeyi barerera muri iki kigo aganira na rwandanews24 yagize ati: “Ibintu byo gusambanya abana muri iki kigo n’ubwo tukirereramo, tubyumvana abana ariko tukagirango ni amagambo y’abana kuko umwana araza akakubwira ngo hari umwana wo mu kigo abana bavuze ko umwarimu cyangwa umuyobozi yamusambanyije. Iyo ukurikiranye umwana ngo umenye neza imvano yabyo, umwana akubwira ko yabyumvanye abandi barimo gukina.”

Akomeza avuga ko umwana bavuga ko yasambanyije ari hagati y’imyaka 15 na 17 y’amavuko. Ati: “Ubwo bigiye kujya ahagaragara n’abandi  bazamenyekana, ikibazo ni uko abana bacu bashobora kuba bakomeje gusambanywa kandi kugirango tubimenye biragoye kuko babaha amafaranga.”

Umuyobozi w’Akarere ka Gatsibo Gasana Richard yemeje amakuru y’itabwa muri yombi rya Baziga Emmanuel umuyobozi wa Nuakayaga Secondary School agira ati: “Umuyobozi w’ikigo cy’amashuri cya Nyakayaga Secondary School yatawe muri yombi, arimo gukorwaho iperereza ku cyaha cyo gusambanya umwana akekwaho.”

 Icyo itegeko rivuga

ITEGEKO Nº68/2018 RYO KU WA 30/08/2018 RITEGANYA IBYAHA N’IBIHANO MURI RUSANGE

Ingingo ya 133: Gusambanya umwana Umuntu wese ukorera ku mwana kimwe mu bikorwa bishingiye ku gitsina bikurikira, aba akoze icyaha:

1º gushyira igitsina mu gitsina, mu kibuno cyangwa mu kanwa k’umwana;
2º gushyira urugingo urwo arirwo rwose rw’umubiri w’umuntu mu gitsina, cyangwa mu kibuno cy’umwana;
3º gukora ikindi gikorwa cyose ku mubiri w’umwana hagamijwe ishimishamubiri.

Iyo abihamijwe n’urukiko, ahanishwa igifungo kitari munsi y’imyaka makumyabiri (20) ariko kitarenze imyaka makumyabiri n’itanu (25).

Iyo gusambanya umwana byakorewe ku mwana uri munsi y’imyaka cumi n’ine (14), igihano kiba igifungo cya burundu kidashobora kugabanywa kubera impamvu nyoroshyacyaha.

Iyo gusambanya umwana ufite cyangwa urengeje imyaka cumi n’ine (14) byamuteye indwara idakira cyangwa ubumuga, igihano kiba igifungo cya burundu.

Iyo gusambanya umwana byakurikiwe no kubana nk’umugabo n’umugore, igihano kiba igifungo cya burundu kidashobora kugabanywa kubera impamvu nyoroshyacyaha. Iyo icyaha cyo gusambanya umwana cyakozwe hagati y’abana bafite nibura imyaka cumi n’ine (14) nta kiboko cyangwa ibikangisho byakoreshejwe, nta gihano gitangwa.

Icyakora, iyo umwana ufite imyaka cumi n’ine (14) ariko utarageza ku myaka cumi n’umunani (18) asambanyije umwana uri munsi y’imyaka cumi n’ine (14), ahanwa hakurikijwe ibiteganywa mu ngingo ya 54 y’iri tegeko.