December 7, 2021

Rwandanews24

Publishing Factual, verified and accurate stories

Polisi n’Abikorera ku isonga mu kurya Ruswa-TI-Rw

YASUWE 76 

Raporo y’umuryango urwanya ruswa n’Akarengane (Transparency International Rwanda TI-Rw), igaragaza ko Polisi Ishami ryo mu Muhanda ndetse n’urwego rw’abikorera, ari zo ziza ku isonga mu nzego ruswa yiyongereyemo cyane kurusha izindi mu mwaka wa 2020.

Ubu bushakashatsi bwerekanye ko polisi yo mu muhanda n’abikorera baza ku isonga mu nzego ruswa yiyongereyemo cyane muri 2020.

Ibyasohotse muri ubu bushakashatsi ngarukamwaka bukorwa na TIR hagamijwe kureba uko ruswa ihagaze mu gihugu, raporo izwi nka Rwanda Bribery Index (RBI) yashyizwe ahagaragara kuwa kane, tariki ya 28 Mutarama 2021, iki gikorwa kikaba cyabaye hifashishijwe ikoranabuhanga.

Iyi raporo muri rusange yagaragaje ko 52,8% by’Abanyarwanda babona ko ruswa iri ku kigero cyo hasi, bavuye kuri 61,9% mu 2019, mu gihe 20,5% babona iri ku kigero cyo hejuru, bavuye kuri 13,3% urwego byariho muri 2019.

Mu nzego zagarayemo ruswa kurusha izindi mu itangwa rya serivisi muri 2020, harimo Polisi Ishami ryo mu Muhanda, yagaragawemo na ruswa ku kigero cya 12% ivuye kuri 9,07% yari iriho mu 2019,

Ni mu gihe urwego rw’abikorera ruswa yagaragayemo ku kigero cya 7% ivuye kuri 4.23% yariho muri 2019.

Uretse aho ruswa byagaragaye ko yazamutse, hari inzego zimwe aho yagabanutse n’ubwo ikigero cyayo naho kikiri hejuru, aho harimo Urwego rw’Ubugenzacyaha (RIB), ruswa yavuye kuri 7,08% mu 2019 ikagera kuri 6% mu 2020; harimo kandi urwego rw’abacamanza, aho yavuye kuri 4,50% ikagera kuri 4,30%.

Ubu bushakashatsi bwagaragaje ko zimwe mu mpamvu abantu bagaragaje nk’izatumye batanga ruswa, ku isonga haza gushaka ko serivisi bashakaga zihutishwa, hari kandi kuba bwari bwo buryo bwonyine bashobora kubonamo izo serivisi.

Gushaka kubona serivisi batemerewe n’amategeko, kwirinda kugirana ibibazo n’abayobozi ndetse no kudashaka kwishyura ikiguzi cyose cya serivisi.

Serivisi zakunze kwiganzamo ruswa nk’uko RBI 2020 ibyerekana, zirimo kwaka ibyangombwa byo kubaka biri ku kigero cya 61%, kubona inka muri Girinka biri kuri 50%, kubona akazi mu rwego rw’abikorera, gusanganwa ibicuruzwa bitujuje ubuziranenge, gufungirwa resitora n’ibindi.

Uretse kumurika ibyavuye muri RBI 2020, TI-Rw yanamuritse raporo mpuzamahanga ya “Corruption Perceptions Index (CPI) 2020”, yagaragaje ko ku rwego mpuzamahanga, u Rwanda ruri ku mwanya wa 49 n’amanota 54%, ruvuye ku mwanya wa 51 n’amanota 53% mu 2019, rukaba rukiri urwa kane muri Afurika ndetse n’urwa mbere mu Karere.

Mu zindi nzego zagaragayemo izamuka rikabije rya ruswa mu mwaka ushize, harimo Ikigo gishinzwe Isuku n’Isukura (WASAC) yagaragawemo na ruswa ku kigero cya 5,40% ivuye kuri 3,53% yari iriho mu 2019, hari kandi mu nzego z’ibanze aho yavuye kuri 2,51% mu 2019 ikagera kuri 4,90% mu 2020.

Ubu bushakashatsi bwa TIR bwerekanye ko Polisi yo mu muhanda n’Urwego rw’abikorera baza ku isonga mu nzego ruswa yiyongereyemo cyane muri 2020