December 6, 2021

Rwandanews24

Publishing Factual, verified and accurate stories

Rubavu: Nyuma y’Igihe bugarijwe n’amabandi bizeye umutekano mu minsi mike

YASUWE 114 

Bamwe mu baturage bo mu karere ka Rubavu, Umurenge wa Gisenyi mu kagari ka Mbugangari baravuga ko bizeye umutekano usesuye mu minsi mike nibamara gukorerwa uduhanda two mu midugudu ibahuza, hagashyirwaho n’amatara rusange bizabarinda abajura bihishaga mu mwijima bakabacucura utwabo. Ubuyobozi bw’Akarere buvuga ko ibikorwa biteza imbere abaturage bazakomeza kubishyiramo imbaraga kuko bakorera abaturage.

Aba baturage babitangarije itangazamakuru kuwa gatanu, tariki 29 Mutarama 2021 ubwo hatangizwaga ku mugaragaro imirimo yo gukora uduhanda duhuza Agakiriro ka Mbugangari n’Isoko ndetse hatatunganywa uduhanda dushamikiyeho tubihuza n’umuhanda munini w’isoko ryambukiranya imipaka.

Bamwe mu baturage baganiriye n’itangazamakuru bavuze ko bishimye cyane kuko uyu muhanda uzaborohereza mu kazi, ndetse n’amatara azashyirrwaho akabafasha kubarinda abajura babazengereje.

Bizimana Jean ati “Uyu muhanda tuwitezeho byinshi kuko uduhuza na Gare ndetse uracyemura ikibazo cy’amazi menshi yamanukaga hano akanadusenyera, none kuba bazubaka ama Rigole meza ikibazo kizakemuka ndetse udufashe kuduhuza nindi midugudu yo hirya no hino.”

Nikuze Emmerance ati “Iyi mihanda igiye kudukiza amabuye kuko tuyacamo dusitara ndetse bizanadukiza abajura batumereye nabi, baratobora amazu buri kanya kubera ko bihishaga mu mwijima, ndetse tuzajya tugenda ahabona hanasukuye, natwe nk’abaturage tuzabasha kuwusigasira twirinda kumena imyanda muri Rigore, tuzajya tuyishyira mu mifuka tugategereza ko baza kuyitwara.”

Habyarimana Gilbert, umuyobozi w’akarere ka Rubavu avuga ko iyi mihanda irimo gukorwa muri aka karere bizorohereza abaturage n’abashoramari bakorera muri aka karere.

Habyarimana Gilbert ati “Uyu mushinga ugomba guteza imbere ibikorwa birimo isoko ryambukiranya imipaka, no korohereza ibikorerwa mu gakiriro ka Mbugangari n’isoko ryaho ndetse n’abaturage babituriye, kugira ngo ibihakorerwa byongererwe agaciro.”

Iki gikorwa n’icy’abaturage batuye muri Mbugangari, ndetse ku bufatanye n’abashoramari igikorwa kizagenda neza cyane, umushinga bawugire uwabo mu kuwukurikirana no mu ishyirwamubikrwa byawo, kuko uretse uduhanda bazakora n’inzira z’amazi yasenyeraga bamwe muribo, bitumen ishusho ya Mbugangari irushaho gusa neza.

Iyi mihanda igiye gutunganywa uje usanga indi irimo gukorwa, ukba uzatwara akayabo ka Miliyoni 847 z’amafaranga y’u Rwanda, aho izashyirwaho amatara rusange amurikira abayikoresha, ikaba irimo kubakwa ku nkunga ya Enabel.

Habyarimana Gilbert, Umuyobozi w’akarere ka Rubavu ubwo yarimo akata akagozi atangiza imirmo ku mugaragaro
Abitabiriye igikorwa ubwo barimo basobanurirwa byinshi kuri uyu mushinga
Umuhanda uhuza Gare n’Agakiriro ndetse n’isoko bya Mbugangari harimo imashini zirimo kuwutunganya
Umuyobozi w’akarere ka Rubavu ubwo yarimo atwara imashini itunganya umuhanda