December 1, 2021

Rwandanews24

Publishing Factual, verified and accurate stories

Turimo kubaka ubushobozi ngo dutangire gupima ubwoko bushya bwa Covid19- Minisitiri Ngamije

YASUWE 74 

Ibi ni ibyatangajwe na Minisitiri w’ubuzima Dr Ngamije Daniel avuga ko u Rwanda rurimo kubaka ubushobozi ngo butangire gupima ubwoko bushya bw’icyorezo cya Covid19 kuko kugeza magingo aya, kitaratangira gupimwa kuva cyatangira gutahurwa mu bihugu by’amahanga.

Mu kiganiro inzego zitandukanye zirimo iz’Ubuzima, polisi n’izindi, ku mugoroba wo kuri iki cyumweru taliki ya 24 Mutarama 2021 ubwo batangaga ishusho n’impumeko ya #GumaMuRugo ya 2 mu mujyi wa Kigali, bavuze ko mu gihe cy’iminsi 5 ishize imibare y’ubwandu bushya yatangiye kugabanuka ugereranyije na mbere y’uko hajyaho #GumaMuRugo ya 2.

Minisitiri w’ubuzima Dr Ngamije Daniel abajijwe niba ubwoko bushya bwa Covid19 mu Rwanda bwaratangiye gupimwa kuko bwanagaragaye muri Kenya nka kimwe mu bihugu bigize umuryango wa Afrika y’uburasirazuba n’ u Rwanda rubarizwamo, yavuze ko itaratangira gupimwa.

Yagize ati “Ntabwo turayisuzuma ngo tuvuge ngo ng’iyi, ngo ufate virus dusanganywe n’iyo yindi kuko hari virus yo muri Afurika y’Epfo cyangwa u Bwongereza cyangwa ahandi, ariko ni ubushobozi burimo  kubakwa kandi mu minsi ya vuba turaba tubufite abantu baturuka hanze cyane cyane mu bagenzi baturuka hanze nihagira abo tubona bafite ubwandu bwa Covid-19 by’umwihariko tuzashaka gukurikirana ngo ese bafite ubuhe bwoko bwa virus?”.

Abahanga mu by’ubuzima basobanura ko virus zihinduranya ziba zifite umutima witwa RNA ushinzwe kubika amakuru ya virus ndetse ukayifasha kwihinduranya. Covid-19 nayo ni imwe muri izo virus, ku buryo n’abashakashatsi bari biteze ko ishobora kwihinduranya.

RNA, Ribonucleic Acid, umuntu yayisobanura nk’intima nto zihuza kugira ngo zikore igikorwa runaka. Urugero, ihuriro rya RNA ni zo zihura kugira ngo zikore ibyubaka umubiri (protéine) bifasha ingingo zawo gukura.

RNA ni yo yifashishijwe n’abahanga mu gukora inkingo bakora urwa Pfizer / BionTech ndetse n’urwa Moderna.

Kwihinduranya kwa virus bizwi nka ‘mutation’ mu ndimi z’amahanga, kubaho mu buryo bubiri. Ubwa mbere iba yihinduranyije ku buryo bukabije cyane mu gihe ubwa kabiri bwitwa ‘minor mutation’ iba yihinduranyije ku buryo bworoheje ndetse bikunda kugaragara kuri virus nyinshi cyane zirimo na Covid-19 ubu.

Ubusanzwe Virus iba ifite “code” iyiranga, iba igizwe n’inyuguti nyinshi, iyo rero ibipimo bigaragaje ko izo nyuguti za virus ziri kwihinduranya cyane kuva aho zitangirira kugeza aho zirangirira byitwa “major mutation” kandi biba biteye inkeke kuko imiti n’inkingo bitayibasha.

Kugeza ubu kwihinduranya kwa Covid-19 ntabwo kuragera ku rugero rwo hejuru ku buryo imiti cyangwa inkingo bitakora, gusa igiteye impungenge ni uko yihinduranyije ku buryo yandura ku rugero rwo hejuru cyane, nubwo hataragaragara niba yatuma umuntu aremba cyane cyangwa abura ubuzima byihuse.

Ubu bwoko bushya bwa Coronavirus buracyari gukorwaho iperereza, bwahawe izina rya VUI-202012/01.

Mu Cyumweru cya taliki ya 9 Ukuboza 2020, mu Mujyi wa Londres 62% by’ubwandu bwa COVID-19 bwari buturutse kuri ubu bwoko bushya bw’iyi virus. Ni umubare munini ugereranyije na 28% ry’ubwandu bwagaragaye mu cyumweru cyari cyabanje.

Ntabwo abashakashatsi baremeza niba inkingo nk’urwakozwe na Pfizer/BioNtech cyangwa izindi zishobora kurinda ikwirakwira ry’ubu bwoko bushya bwa Covid-19.