December 1, 2021

Rwandanews24

Publishing Factual, verified and accurate stories

Uko icyorezo cya COVID19 gihagaze mu Rwanda

YASUWE 132 

Icyorezo cya coronavirus gikomeje koreka imbaga ku isi no mu Rwanda kikaba kimaze gufata indi intera, bwa mbere Minisiteri y’Ubuzima yatangaje ko taliki ya 20 Mutarama 2021 abantu 312 banduye iki cyorezo, akaba ari nabwo bwa mbere handuye abantu benshi kuva iki cyorezo cyagaragara mu Rwanda muri Werurwe 2020.

Abantu bamaze kwandura covid19 mu Rwanda ni ibihumbi 11, 850, abamaze kuyikira ni ibihumbi 7,812, abo imaze kwica ni 153, naho abakirwaye ni ibihumbi 3,897.

Umuryango wa Afurika Yunze Ubumwe (AU) nawo utangaza ko umaze guhabwa inkingo miliyoni 270 za COVID-19, zizafasha ibihugu birimo ibidafite ubushobozi bwo gukingira abaturage babyo.

Itangwa ry’izi nkingo ryatangajwe na Cyril Ramaphosa, Perezida wa Afurika y’Epfo, igihugu kiyoboye Umuryango wa Afurika Yunze Ubumwe.

Inkingo zatanzwe ni izakozwe na Pfizer-BioNTech na AstraZeneca zikorerwa mu Buhinde ndetse n’iza Johnson & Johnson, zirimo izigera kuri miliyoni 50 zizaboneka hagati ya Mata na Kamena 2021.

Mu itangazo Perezida Cyril Ramaphosa yashyize hanze yagize ati “Twateye indi ntambwe ituganisha ku kubona inkingo mu buryo bwigenga kandi dukoresheje ubushobozi bwacu.’’

Amasezerano ashyigikira ibihugu byo muri Afurika kugura inkingo yashyigikiwe na Banki y’Isi ndetse na Banki Nyafurika iteza imbere ubucuruzi (African Export-Import Bank, Afreximbank).

Afurika yagerageje guhangana na Coronavirus kuko kugeza ubu uyu mugabane umaze kubonekamo abanduye iki cyorezo barenga miliyoni eshatu, abo cyahitanye ni 74 000 mu gihe muri Amerika y’Epfo n’ibihugu bya Caraïbes handuye miliyoni 16, cyica 500 000.

Biteganyijwe ko doze za mbere z’inkingo za COVID-19 zigomba gutangira gutangwa mu mpera za Mutarama n’intangiriro za Gashyantare uyu mwaka.

Muri iki gihe ku Mugabane wa Afurika hari kugaragara icyorezo cyongeye kwiyuburura nk’aho muri Afurika y’Epfo, igihugu kiri mu byugarijwe hamaze kuboneka abarwayi ba Coronavirus miliyoni 1,2 mu gihe abitabye Imana ari 35 000.

Gahunda yatangijwe n’Umuryango wa Afurika Yunze Ubumwe itandukanye n’iy’inkingo zizatangwa binyuze muri COVAX y’Ishami ry’Umuryango w’Abibumbye ryita ku Buzima (OMS) igamije kuzorohereza ibihugu kugerwaho n’urukingo ubwo ruzaba rubonetse.

Intego ya OMS ni uko ibihugu biri muri COVAX bizahabwa inkingo zingana na 20% by’abaturage batuye ibihugu biyibarizwamo bitarenze umwaka.

Mu cyumweru gishize, OMS yatangaje ko ibi bihugu bizatangira kubona inkingo mu mpera za Mutarama no mu kwezi kwa Gashyantare.

Itangazo rya Perezida Ramaphosa uyobora AU rivuga riti “Niba gahunda ya COVAX ari ingenzi kuri Afurika, Umuryango wa Afurika Yunze Ubumwe usanga ingano y’izizaba [inkingo] zabonetse hagati ya Gashyantare na Kamena itazarenga izikenewe bijyanye n’umubare uzamuka kubera icyorezo muri Afurika.’’

Ibihugu birenga 180 nibyo bimaze gusinya ku masezerano ya COVAX, yashyizweho na OMS, igamije guhuriza imbaraga z’ibihugu hamwe kugira ngo bibashe kubona inkingo za COVID-19.

Icyakora hagaragajwe ko intego yo gukingira 20% by’abaturage idahagije mu guhagarika ikwirakwira rya Coronavirus.

Abahanga bo mu Kigo Nyafurika gishinzwe kurwanya no gukumira indwara (Africa CDC) bagaragaje ko nibura abantu 60% nibamara gukingirwa aribwo bishobora kuzaca intege ikwirakwira rya Coronavirus.

Ibihugu bikize byakunze kunengwa kutubahiriza amasezerano yo gusaranganya inkingo za COVID-19, ahubwo bikaziharira mu gihe ibikennye bigowe cyane no kuba byagerwaho nazo.

Kuri ubu hamaze gutangwa doze miliyoni 39 z’inkingo mu bihugu 49 bikize, mu gihe igihugu kimwe gikennye cyahawe doze 25 gusa.