December 6, 2021

Rwandanews24

Publishing Factual, verified and accurate stories

Ruhango: DASSO ukekwaho gusambanya umwana yatawe muri yombi

YASUWE 120 

Umugabo w’imyaka 37 wo mu Karere ka Ruhango mu Murenge wa Ruhango, Akagali ka Munini mu Mudugudu wa Gaseke mu rwego rufasha uturere mu gucunga umutekano (DASSO) ku cyumweru taliki ya 10 Mutarama 2021 yatawe muri yombi akekwaho icyaha cyo gusambanya umwana w’imyaka 17 y’amavuko.

Uwo mugabo bivugwa ko yasambanyije uwo mukobwa usanzwe ubarizwa mu rubyiruko rw’abakorerabushake bakangurira abantu kubahiriza amabwiriza yo kwirinda COVID19, ngo akaba yaramusambanyije mu bihe bitandukanye amufatiranye.

Umuvugizi w’Urwego rw’Igihugu rw’Ubugenzacyaha (RIB), Dr Murangira B. Thierry, yemeje ko uwo mugabo yafashwe, akaba afungiye kuri Sitasiyo ya RIB ya Ruhango mu gihe hagikorwa iperereza.

Yasabye abantu kwirinda icyaha cyo gusambanya abakiri bato, bitwaje ko abo bana bafite igihagararo.

Ati “Ntabwo ubukure bw’umwana bupimirwa mu gihagararo kandi tuributsa ko umwana wese ari umuntu utaragira imyaka 18, abe afite igihagararo kinini abe afite gitoya. Turasaba abantu ko bazirikana ibyo bintu bakirinda gusambanya umwana. Turasaba n’abandi bagerageza guhishira ibintu nk’ibyo ko bajya batanga amakuru hakiri kare.”

Dr Murangira yasabye abana kugira amakenga, bakamenya gutahura ababashuka kandi bakabiganiriza ababarera nk’uko Igihe dukesha iyi nkuru cyabyanditse.

Ingingo ya 133 y’itegeko rigena ibyaha n’ibihano ivuga ko uhamijwe icyaha cyo gusambanya umwana ahanishwa igifungo kitari munsi y’imyaka makumyabiri ariko kitarenze imyaka makumyabiri n’itanu.

Iyo gusambanya umwana byakorewe ku mwana uri munsi y’imyaka cumi n’ine, igihano kiba igifungo cya burundu kidashobora kugabanywa kubera impamvu nyoroshyacyaha.

Iyo gusambanya umwana ufite cyangwa urengeje imyaka cumi n’ine byamuteye indwara idakira cyangwa ubumuga, igihano kiba igifungo cya burundu.