December 1, 2021

Rwandanews24

Publishing Factual, verified and accurate stories

Etiyopiya: Umugaba mukuru w’ingabo Gen. Seare Mekonnen yishwe arashwe

YASUWE 60 

Mugitondo cyo kuri iki cyumweru taliki ya 23 Kamena 2019, Guverinoma ya Etiyopiya yatangaje ko Jenerali Seare Mekonnen, umugaba mukuru w’ingabo z’iki gihugu, yishwe arashwe, mu gihe hakomeje imvururu mu karere k’amajyaruguru ka Amhara.

Minisitiri w’intebe wa Ethiopia, Abiy Ahmed, yagaragaye kuri televiziyo y’igihugu yambaye imyenda ya gisirikare avuga ko Jenerali Mekonnen yagabweho igitero mu murwa mukuru Addis-Abeba w’iki gihugu n’abo yise “abacanshuro”.

Amakuru dukesha Radio mpuzamahanga y’Abafaransa RFI, aravuga ko Bwana Abiy yavuze ko Jenerali Mekonnen yishwe ari mu bikorwa byo kugerageza guhosha imimvurur mu karere ka Amhara.

Mbere yaho, leta ya Ethiopia yari yatangaje ko habayeho “kugerageza guhirika ubutegetsi” mu karere ka Amhara.

Mu myaka ya vuba ishize, ibikorwa by’urugomo rushingiye ku moko byibasiye akarere ka Amhara n’utundi turere.

Abayobozi  bavuze ko mu kindi gitero gifitanye isano n’icyahitanye Jenerali Mekonnen, umukuru w’intara ya Amhara, Dr. Ambachew Mekonnen, na we yishwe arashwe mu murwa mukuru Bahir Dar w’akarere ka Amhara.

Bwana Abiy yavuze ko uwo mukuru w’akarere ka Amhara yari mu nama n’abandi bayobozi b’akarere, akicanwa n’abandi bayobozi barashwe na bagenzi babo bakorana.

Amakuru avuga ko umurongo wa internet utarimo gukora muri iki gihugu.

Brigadier Jenerali Asamnew Tsège, uri mu kiruhuko cy’izabukuru wahoze ari umukuru w’iperereza mu ntara ya Amhara akaba aherutse gufungurwa, yatawe muri yombi acyekwaho kuba inyuma y’ibyo bitero.

Abaturage bo mu mujyi wa Bahir Dar bavuze ko bumvise urusaku rw’imbunda ziremereye. Umwarimu wa kaminuza wo muri uyu mujyi yabwiye ibiro ntaramakuru Reuters ko urusaku rw’amasasu rwamaze amasaha agera kuri ane.

Minisiteri y’ububanyi n’amahanga ya Leta Zunze Ubumwe z’Amerika yavuze ko izi amakuru y’urusaku rw’amasasu mu murwa mukuru Addis-Abeba, iburira abakozi bayo muri icyo gihugu.

Kuva yagera ku butegetsi muri Mata 2018, Bwana Abiy yatangiye ibikorwa byo gusoza ipyinagaza muri politiki afungura imfungwa za politiki, yemerera kongera gukora amashyaka yari yarahagaritswe ndetse ageza imbere y’ubucamanza abategetsi bashinjwa guhohotera no guhungabanya uburenganzira bwa muntu.