December 3, 2021

Rwandanews24

Publishing Factual, verified and accurate stories

Habaye intambara niko gusenyuka burundu kwa Irani- Perezida Trump

YASUWE 91 

Perezida Donald Trump wa Leta Zunze Ubumwe z’Amerika yavuze ko adashaka intambara, ariko aburira Irani ko iramutse ibaye yaba ivuze “isenyuka rya burundu” rya Irani.

Mu kiganiro na televiziyo NBC yo muri Amerika kuri uyu wa gatanu taliki ya 21 Kamena 2019, yavuze ko Amerika ishyize imbere ibiganiro, ariko ko itakwemerera Irani gukora intwaro kirimbuzi za nikleyeri.

Yanasobanuye birushijeho ku cyemezo cye yafashe ku munota wa nyuma cyo kwisubiraho ku bitero by’indege, nk’igisubizo ku ihanurwa muri iki cyumweru ry’indege nto yitwara nta mupilote (drone) ya Amerika, avuga ko yabwiwe ko abaturage bagera ku 150 ba Irani barikubipfiramo.

Yagize ati: “Sinabikunze. Sintekereza ko byari bishyize mu gaciro”.

Yavuze ko umugambi wo gutera Irani “wari wamaze kunoga, urindiriye gusa ko mwemeza”, ariko avuga ko yari yahise abaza abajenerali b’Amerika abantu bari gupfira muri ibyo bitero, nuko yisubiraho.

Perezida Trump yavuze ko Iran nishaka intambara bizaba ari ukurangira kwayo burundu

Yahakanye amakuru avuga ko indege z’intambara za Amerika zari zamaze kugera mu kirere zitumbereye muri Irani.

Irani ivuga ko iyo drone ya Amerika yahanuye yari yinjiye mu kirere cyayo mu rukerera rwo ku wa kane taliki ya 20 Kamena 2019. Amerika ishimangira ko drone yayo yarasiwe mu kirere ubundi gihuriweho n’amahanga atandukanye, kitari icya Irani.

Umwuka w’ubushyamirane ukomeje gututumba hagati y’ibihugu byombi, Amerika ikaba iherutse kwegeka kuri Irani ibitero ku bwato bwayo butwara ibikomoka kuri peteroli bukorera muri ako karere. Irani yatangaje ko izarenza ikigero cyemewe ku rwego mpuzamahanga muri gahunda yayo ya nikleyeri.

Mu mwaka ushize wa 2018, Amerika yikuye mu masezerano yari yagiranye na Irani mu mwaka wa 2015 agamije kugabanya ibikorwa bya nikleyeri bya Irani.

Ubu Amerika yasabye akanama k’umutekano mu muryango w’abibumbye ko gaterana ku wa mbere w’icyumweru gitaha kakiga kuri Irani.