November 27, 2021

Rwandanews24

Publishing Factual, verified and accurate stories

Nta kimenyetso kigaragaza ko Ebola yahagarara – Dr Jeremy Farrar

YASUWE 62 

Umukuru w’ikigo gikora ubushakashatsi mu bijyanye n’ubuvuzi cyo mu Bwongereza yatangaje ko indwara ya Ebola iri muri Afurika yo hagati “mu by’ukuri iteye ubwoba”.

Hafi abantu 1400 imaze kubahitana muri Repubulika ya Demokarasi ya Kongo kuva yatangazwa ko yahadutse muri Kanama 2019.

Dr Jeremy Farrar, umuyobozi w’ikigo Wellcome Trust, yavuze ko iyi Ebola ariyo ya mbere mbi cyane ibayeho ku isi nyuma y’iyibasiye ibihugu bimwe byo mu Burengerazuba bwa Afurika guhera mu mwaka wa 2013 kugera mu wa 2016 igahitana abantu 11,310.

Yongeyeho ko iyi Ebola “nta kimenyetso igaragaza cy’uko yahagarara”.

Nyuma y’amasaha 24 itangajwe ko yageze no muri Uganda, umwana w’umuhungu w’imyaka itanu bayisanzemo bwa mbere yahise imuhitana ku munsi w’ejo ku wa gatatu taliki ya 12 Kamena 2019. Nyirakuru na we yatangajwe ko Ebola yamuhitanye uyu munsi taliki ya 13 Kamena 2019.

Aba ni abashinzwe gufasha abarwayi ba Ebola

Ubu leta ya Uganda itangaza ko hari abandi bantu barindwi bicyeka ko banduye Ebola.

Mu itangazo ikigo Wellcome Trust cyasohoye, Dr Farrar yavuze ko gukwirakwira kw’iyi Ebola “kubabaje cyane, ariko mu buryo buteye agahinda, ntigutunguranye”.

Yaburiye ko abandi bantu bashobora kwandura Ebola, ndetse ko hacyenewe gushyira hamwe “kuzuye” ku rwego rw’igihugu no ku rwego mpuzamahanga mu kurinda abantu kwandura Ebola.

Yagize ati: “Kongo ntikwiye kubyifasha yonyine”.

Ebola ni ndwara ki?

  • Ebola ni virusi itangira itera umuntu guhinda umuriro, gucika intege cyane, kubabara imitsi no kubabara mu muhogo.
  • Uko irushaho gukomera, uyirwaye araruka, agacibwamo ndetse akavira imbere ndetse akava n’amaraso mu bice byo hanze by’umubiri.
  • Abantu bayandura iyo bagize aho bahurira n’abayirwaye, nk’ahari igikomere ku mubiri, mu kanwa no mu mazuru, mu maraso, mu myanda iva mu mubiri cyangwa mu cyuya cy’uyirwaye.
  • Abarwayi ba Ebola akenshi bahitanwa n’umwuma ndetse no kunanirwa gukora kw’ingingo zimwe na zimwe z’umubiri.