November 27, 2021

Rwandanews24

Publishing Factual, verified and accurate stories

Burundi: Kwemera manda ya 3 ya Nkurunziza byaba ari ukuba “Umuja”- Musenyeri Ntamwana

YASUWE 52 

Umuryango Nyafurika w’Ivugabutumwa, Ministere Africain de la Compassion, MAC, wasabye ko amashengero atazongera kwigishirizwamo ubutumwa bujyanye na politike mu Burundi mu gihe bitegura amatora ya 2020.

Umuyobozi wa MAC, Aime Pascal Nduwimana, avuga ko ubutumwa nk’ubwo akenshi bugaruka ku masezerano ya Arusha, wasangaga butangwa muri kiliziya gatorika mu 2015.

Ngo buri mu byakuruye imyigaragambyo muri uwo mwaka nyuma y’aho Prezida Pierre Nkurunziza yari yatangarije ko aziyammamariza indi manda.

Bwana Nduwimana yagize ati: “Muri 2015 bavuze cyane ibintu bya Arusha mu madini n’amatorero hamwe abantu wasangaga banabuze uko batandukanya Umusenyeri, umuntu asenga Imana, n’umunyapolitiki.

“Abantu byarabacanze cyane, aho wasangaga munsengero habaye nko muri permanance muri politiki.”

Ijambo rya Musenyeri Ntamwana

Umuyobozi wa MAC yatangaje ko bazakurikiza ijambo ry’umwepiskopi wa diyoseze ya Gitega, Musenyeri Simoni Ntamwana. Iryo jambo ngo yaribwiye abayoboke bo mu itorero rye muri paruwasi ya Nyabiraba, aho yagize ati: “twagirango tubabwire ko Nkurunziza arangije manda ze, yongeye kwiyamamaza tukabyemera twaba tubaye abaja”.

Bwana Nduwimana yakomeje agira ati: “Ibyo yabivuze mu mwaka wa 2014 ushyira 2015. Ibyo rero byababaje abantu kuko ibyabaye muri 2015, hahise haza amashyaka avuga ngo ‘sindumuja’.

Idini Gatolika rirashinjwa kuvanga politike n’ijambo ry’Imana

“Aba ‘jeunes’ barivumbura cyane kuko bavuga bati, uwaduhamagaye ni umwungere, ni umwepiskopi, avugana n’Imana, rero Imana yamudutumyeho ngo ‘nimumutora muzaba muri abaja.”

Gatolika mu Burundi ivuga ko ari uburenganzira bwayo

Mu gusubiza kuri ibyo bivugwa na MAC, Idini  Gatolika ryavuze ko mu gihe ryemewe n’amategeko mu Burundi rifite uburenganzira bwo kwigisha nk’uko risanzwe ribikora.

Umuvugizi w’inama y’abepiskopi mu Burundi, Musenyeri Joachim Ntahondereye, yabwiye BBC ko bigisha ijambo ry’Imana, ariko rikajyana n’ibihe abantu barimwo.

Musenyeri Ntahondereye yagize ati: “Turigisha iyobokamana rijyanyen’ibihe abantu barimo, kuko iyobokamana riguma mu buzima bw’abantu.

“Abantu nibo bakeneye kurya, bakeneye aho baba heza bagakenera n’umubano mwiza n’ubutegetsi. Rero nicyo gituma mu kwigisha kwacu tutagumya kuvuga gusa ngo Imana iriho, kuko ibyo n’amashetani arabizi. Iyobokamana riguma mu myifatire y’abantu no mu ngendo yabo.”

“Nta ntego yo kwigisha politike”

Abajijwe niba gutanga ubutuma bwa politike burimo nk’iby’amasezerano ya Arusha bitateza ikibazo mu gihe abaje gusenga baba bavuye mu mashyaka atandukanye, Musenyeri Ntahondereye yagize ati: “Twebwe ntituba tugamije kwigisha politike, tuba tugamije kwigisha iyobokamana.”

” Iyobokamana nziza kandi rigaragaza ukuntu abantu bifata n’ingingo bafata zerekeye ubuzima bwa benewabo.”

Abajijwe kandi niba badatinya ko Gatolika yafatirwa ibyemezo, Musenyeri Ntahondereye yavuze ko bishoboka ngo kandi ntibwaba ari ubwa mbere bibaye mu mateka y’ idini Gatolika mu Burundi.

Ntibyari bisanzwe ko idini Gatolika, rifatwa nk’irikomeye mu madini y’abakristu mu Burundi, rishyirwa mu majwi n’abarishinja kwivanga muri politike.

Mu Burundi abakristu bagize 90% by’abemera Imana bavuga ko ari Abakristu, benshi muri abo bakaba ari abagatolika.