December 1, 2021

Rwandanews24

Publishing Factual, verified and accurate stories

Nyuma yo kwegukana igikombe cya Champions League Jurgen Klopp arahabwa amasezerano y’igihe kirekire- Fenway Sports Group

YASUWE 78 

Ba nyir’ikipe ya Liverpool batangaje ko bashaka kugumana umutoza Jurgen Klopp muri iyi kipe bakamuha andi masezerano y’igihe kirekire, nyuma y’aho yegukaniye igikombe cya Champions League cy’uyu mwaka wa 2019.

Abafana bagera ku bihumbi 75 ni bo bakiriye Klopp ufite kontaro yo kugera mu mwaka wa 2022 atoza iyi kipe hamwe n’abakinnyi be ubwo iyi kipe ku cyumweru taliki ya 3 Kamena 2019 yageraga mu mujyi wa Liverpool ikubutse i Madrid muri Espanye aho yatsindiye Tottenham ibitego 2-0 ku mukino wa nyuma.

Kompanyi y’Abanyamerika ya Fenway Sports Group ari bo ba nyir’iyi kipe ya Liverpool, ivuga ko ishaka kongera kontaro y’uyu Mudage w’imyaka 51 y’amavuko akayitoza by’igihe kirekire.

Tom Werner, ukuriye kompanyi Fenway Sports Group

Tom Werner, ukuriye kompanyi Fenway Sports Group, yagize ati: “Jurgen ni umutoza mwiza cyane, ariko by’ingenzi kurushaho, ni umugabo wicisha bugufi kandi wita ku byo akora”.

“Ubwo abakinnyi bateraga Jurgen mu kirere nyuma y’intsinzi yacu, bari barikwemeza ibyo abafana bose ba Liverpool bazi ko akundwa na buri wese ukunda umupira w’amaguru”.

Ni cyo gikombe cya mbere gikomeye Klopp atsindiye kuva yagera ku kibuga Anfield cya Liverpool mu mwaka wa 2015. Yavuze ko byamurenze kubona imbaga y’abafana bagiye kuyakira bishimira iyo ntsinzi.

Klopp yabwiye televiziyo ya Liverpool, LFC TV, ati: “Sinzi neza umubare w’abatuye mu mujyi wa Liverpool, ariko bisa nkaho andi makipe atahafite umubare munini w’abafana”.

“Birarenze. Niba uri umwana muto, wafana iyihe kipe? Nta mahitamo menshi ahari uretse Liverpool. Urabibona mu maso ukuntu ari ibintu birenze kuri bo. Ni ibyishimo bikomeye”.

Iyi Liverpool yari yatsinzwe na Real Madrid ku mukino wa nyuma wa Champions League mu mwaka ushize w’imikino wa 2018, yarangije shampiyona y’uyu mwaka yo mu Bwongereza n’amanota 97 iri ku mwanya wa kabiri, irushwa inota rimwe gusa na Manchester City.