December 6, 2021

Rwandanews24

Publishing Factual, verified and accurate stories

Karongi: Abakoreye Quick star service ltd bamaze amezi 5 badahembwa

YASUWE 107 

Abakozi bakorera Company ya Quick star service Ltd mu karere ka Karongi, isanzwe ikora akazi ko kurinda umutekano w’abantu n’ibintu byabo, barataka inzara ko bamwe muribo bamaze amezi asaga 5 badahembwa, ndetse bakaba bahangayikishijwe nuko aho barindaga umutekano mu mazu yabagamo ibyuma by’imikino y’amahirwe bikunze kitwa ibiryabarezi hafunzwe, hatagikora kandi bo bakaba bakomeje kurinda umutekano nubwo badahembwa, mu gihe umuyobozi wiyi Company Capt. Kavuna Emmanuel avuga ko barimo gushakisha uburyo aba bakozi bafashwa nibasanga koko ayo mezi bavuga ariyo, nyuma yuko icyorezo cya Corona gihangayikishije isi muri rusange kizaba gicogoye, imirimo ikomeje uko yahoze nyuma yuko kuri ubu yahagaze.

Bamwe mu bakozi bakorera iyi Company batangarije rwandanews24 ko inzara yenda kubatsinda mu mazu, kandi bakaba batabasha guta akazi kuko baba bishe amasezerano, bamwe muribo abagore bakaba baramaze kubasiga bakisubirira iwabo, kubera inzara irimo iravuza ubuhuha mu ngo zabo.

Uyu utifuje ko amazina yiwe atangazwa yagize ati: “Twebwe ikibazo dufite nuko company dukorera yo ifite amasezerano n’umushinwa ufite ibiryabarezi, ari nabyo dushinzwe gucunga umutekano wabyo, tukaba tumaze gukora amezi atanu tudahembwa, inzara iratwishe, nkanjye umugore wanjye yarantaye arigendera kubera inzara, ubu ntahantu ndi kandi na nyiri nzu nawe akeneye ubukodi, twagerageje no kwandikira akarere ngo kadukorere ubuvugizi twishyurwe ariko ntiturabasha gusubizwa, polisi n’umurenge nabo bazi ikibazo cyacu, gusa nyuma haje abayobozi bakuru ba Company baduha icyumweru ko gishira twahembwe none bimaze kuba ukwezi kose tugitegereje, kuburyo niyo tugerageje kubahamagara kuri numero ya telephone badusigiye ntibayifata.”

Kavuna Emmanuel umuyobozi wa umuyobozi wa quick star service ltd, akaba na nyirayo nyuma yuko umunyamakuru wa rwandanews24 amuhamagaye ngo adusobanurire icyihishe inyuma yo kutishyura abakozi kandi barakoze ntafate telefone, nyuma akaza kubasha kohereza ubutumwa bugufi yasobanuye impamvu.

Ubutumwa bugufi yohereje bwagiraga buti: “Kubera ibi bihe turimo turigushakisha uburyo bafashwa, nyuma yo gusuzuma ko ayo mezi bavuga ariyo, kandi namwe murabizi ko abakozi batagikora kubera icyorezo cya corona virus, bityo birabasaba gutegereza kugeza igihe abagomba kubafasha bagaruka mukazi.”

Si abakozi bakorera iyi Company bo mu karere ka Karongi bavuga ko bamaze igihe kinini badahembwa, kuko mu ntangiriro z’ukwezi kwa 3, abakozi bakorera iyi Company mu turere twa Rusizi na Nyamasheke baheruka gutangariza Radio&Tv1 ko nabo baberewemo amezi ane.