December 7, 2021

Rwandanews24

Publishing Factual, verified and accurate stories

Kamonyi: Umugabo yariwe n’ingona arapfa nyuma yo kurenga ku mabwiriza ya leta abuza abantu kuva mu ngo zabo mu kwirinda coronavirus.

YASUWE 96 

Umugabo utaramenyekana amazina wo mu murenge wa Rugarika mu karere ka Kamonyi  yariwe n’ingona arapfa Bivugwa ko uyu muturage yari agiye kuroba amafi mu ruzi rwa Nyabarongo.

Ingona yamufatiye ku nkombe z’uyu mugenzi mu murenge wa Runda mu kagari ka Ruyenzi mu mudugudu wa Rubumba nk’uko bivugwa na Alice Kayitesi uyobora akarere ka Kamonyi.

Madamu Kayitesi yabwiye BBC ko uyu yari yarenze ku mabwiriza ategeka abaturage kuguma mu ngo zabo bagasohoka ari uko biri ngombwa cyane.

Twirinde covid-19 iterwa na coronavirus

Abaturage bamwe mu Rwanda, cyane ababeshwaho akazi bakoze ku munsi, babwiye BBC ko bafite ubwoba bwo kwicwa n’inzara kuko batizigamiye ibizabatunga mu byumweru bibiri batava mu ngo.

Madamu Kayitesi avuga ko abaturage bose batumvira rimwe amabwiriza yatanzwe. Avuga ku karere ayoboye yagize ati:

“Ariko uko bari kuyubahiriza biri ku kigero gishimishije kandi nabo barumva ko bakwiye kwirinda ingaruka z’iki cyorezo abenshi ubu bari mu ngo.

“Uwo { ingona yariye} ni umwe muri bacye baba barenze ku mabwiriza, dukomeje gushishikariza abaturage kuyubahiriza bakaguma mu ngo kugira ngo dufatanye kwirinda”.

Amabwiriza yatangiye kubahirizwa ku cyumweru avuga ko abaturage bashobora gusohoka gusa bagiye kugura ibiribwa, kuri banki, kwivuza cyangwa gutanga serivisi zihutirwa.

Amabwiriza yo kutava mu ngo agoye bamwe mu baturage b’amikoro macye, barimo abadashobora kujya aho bizeye kubona icyo barya, cyane abakomoka mu byaro ubu bari mu mijyi.

Ku mbuga nkoranyambaga, ejo hasakaye amashusho (video) y’abaturage bariho baca mu gishanga cya Nyabarongo bagerageza gusohoka mu mujyi wa Kigali ngo batahe.

 

Yanditswe na Theophile Bravery @rwandanews24.rw  Source:BBC