November 27, 2021

Rwandanews24

Publishing Factual, verified and accurate stories

Umuyobozi Mukuru wa HRW ntakemerewe gukurikira Perezida Kagame kuri Twitter

YASUWE 46 

Umuyobozi Mukuru w’umuryango uharanira uburenganzira bwa muntu, Human Right Watch, Kenneth Roth ntacyemerewe gukurikira Perezida Kagame ku rubuga rwa Twitter.

Ibi byagaragaye ubwo uyu Munyamerika wayoboye HRW kuva mu 1993 yabitangarizaga kuri uru rubuga kuri iki cyumweru taliki ya 22 Werurwe 2020.

Kwamburwa uburenganzira bwo gukurikira umuntu kuri Twitter

Nyiri konte y’uru rubuga ni we ufite ububasha bwo guhagarika (block) undi umukurikira, mu gihe adashimishwa n’ubutumwa bwe, cyane cyane ibitekerezo. Uhagaritswe ntabwo ashobora kongera gukurikira uwamuhagaritse ndetse ntashobora kubona ubutumwa (tweet) bw’uwamuhagaritse.

Kenneth Roth na HRW bavugwaho kwibasira ibihugu birimo u Rwanda

Uyu muyobozi wa HRW akunze kunenga ibihugu birimo u Rwanda na Isirayeli, ayishinja kubangamira ubusugire bwa Palestine. Uyu muryango (HRW) wo wagiye usohora raporo zitandukanye zivuga ko u Rwanda ari igihugu kitarangwa na demukarasi, kitubahiriza uburenganzira bw’ikiremwamuntu,… abiganjemo Abanyarwanda ntibabyakira neza kuko babonye ko ari ukwibasira iki gihugu n’abayobozi bacyo, gushingiye ku makuru y’ibinyoma.

Roth na HRW ntibashirwa amakenga

Abayobozi bakuru b’uyu muryango bakunze kunengwa kuri raporo isohora mu bihe bitandukanye, bivugwa ko zibasira ibihugu bimwe ku nyungu z’abandi. Ibibazo bya ruswa byagaragayemo, byatumye abantu batekereza ko n’ubundi raporo usohora ziba zashyizwemo  akayabo k’amafaranga kugira ngo habemo kubererekera bamwe.

Ubucukumbuzi buherutse gushyirwa ahagaragara n’ikinyamakuru The Intercept bwagaragaje ko abayobozi barangajwe imbere na Roth bakiriye umuti w’ikaramu wa $470,000 mu 2012, bahawe n’ikigo cyo muri Saudi Arabia cya Al Jaber, cyavuzwemo gukandamiza abakozi.