December 3, 2021

Rwandanews24

Publishing Factual, verified and accurate stories

Kamonyi: Ahahoze umusarane w’umuturage muri Jenoside habonywe imibiri 45 y’Abatutsi bahiciwe mu 1994

YASUWE 63 

Amagambo yuzuyemo amarangamutima n’agahinda by’abacitse ku icumu rya Jenoside yakorewe Abatutsi muri Mata 1994 bo mu Kagari ka Ngoma, Umurenge wa Nyamiyaga ho mu Karere ka Kamonyi, nibyo usanga ku gasozi ka Ngoma nyuma y’uko mu byumweru 2 gusa ni ukuvuga taliki ya 4 na 17 Gashyantare 2020 habonetse imibiri 45 y’Abatutsi bishwe muri Jenoside, ikaba yarabonetse ubwo hasizwaga aharimo kubakwa amazu y’abatishoboye.

Ku nshuro ya mbere ubwo habonekaga iyi mibiri hari taliki ya 4 Gashyantare 2020, ikaba yarabonywe n’abakozi basizaga ikibanza aharimo kubakwa inzu z’abatishoboye nk’uko bivugwa na bamwe muri abo bakozi. Kayinamura Erneste ni umukozi ukuriye abandi kuri iyi shansiye. Mu kiganiro na rwandanews24 Yagize ati: “Ubwo abakozi bari barimo gusiza babonye bimwe mu bimenyetso bigaragaza ko hashobora kuba harimo abantu, kuko uko bakubitaga ipiki bakumva horoshye kurusha aho bavuye, akomeje nko muri santi – metero yahise azamura umwenda kandi urunzeho amabuye.”

 

Yakomeje avuga ko bahise bahashyira ikimenyetso kuko bihutiye guhita babimenyesha ubuyozi. Ubuyobozi bufatanyije n’abo bafundi ngo bahise batangira kuhacukura basanga ni ikinogo gisa n’icyahoze ari umusarane, baracukura bakuramo imibiri y’abantu 42.

Kuri uyu wa mbere taliki ya 17 Gashyantare 2020, muri icyo kibanza aharimo gusizwa ibikoni by’ayo mazu, habonetse ikindi cyobo nacyo gisa n’icyahoze ari umusarane hejuru hagaragaye ibimenyetso by’uko hashobora kuba hari abantu, nacyo baragicukuye basangamo imibiri y’abantu 3 nabo bishwe muri Jenoside yakorewe Abatutsi muri Mata 1994.

Ntirenganya Vedaste, ni umuyobozi wa IBUKA  mu Murenge wa Nyamiyaga, Akarere ka Kamonyi. Aganira na rwandanews24 yatangaje ko ari igikorwa kigayitse kuba abantu bari baturanye n’abandi hagashira imyaka hafi 26 ariko bakaba bataratanze amakuru y’uko abaturanyi babo biciwe mu itongo ryabo, abandi bakaba batarigeze bimuka ariko bakaba badashobora gutanga amakuru.

Yagize ati: “Twebwe nk’abacitse ku icumu rya Jenoside, ibi biduha isura nyayo y’abantu tirikumwe kuko niba umuntu agushishe ahari umurambo, ndumva nta cyiza yakwifuriza.”

Yakomeje avuga ko mu mwaka ushize wa 2019 ubwo muri aka kagali hasizwaga aho kubaka ibyumba by’amashuri nabwo babonye imibiri y’Abatutsi bishwe muri Jenoside yakorewe Abatutsi muri Mata 1994.

Umunyamabanga Nshingwabikorwa w’aka kagali ka Ngoma Hakizimana Jean Bosco yatangarije rwandanews24 ko abaturage batuye aho hafi barimo n’abari abaturanyi b’iyi mibiri yabonywe, abagera kuri 29 bahise batangira gukorwaho iperereza bakaba bari mu maboko ya RIB.

Kubwimana Jean de Dieu, ni Umunyamabanga Nshingwabikorwa w’Umurenge wa Nyamiyaga aka kagali kabarizwamo, akaba yatangarije rwandanews24 ko kuri uyu wa kabiri taliki ya 28 Gashyantare 2020 hamwe n’inzego zitandukanye ko bari bukorane inteko n’abaturage bo muri aka Kagali kugirango bashishikarizwe gutanga amakuru y’ahantu bashobora kuba bakeka ko haba hari imibiri y’abantu kugirango bashyingurwe mu cyubahiro.