December 7, 2021

Rwandanews24

Publishing Factual, verified and accurate stories

Ikoranabuhanga rigiye kubikira imbehe abibiraga muri serivisi z’ubucuruzi

YASUWE 80 

Mu gihe ikoranabuhanga rikomeje koroshya uburyo bw’imikorere harimo no kwihutisha serivisi, mu rwego rw’ubucuruzi rukunze gukemangwamo ubunyangamugayo ngo iki kibazo cyaba kigiye kuba amateka kubera ikoranabuhanga n’abajyaga babwibiramo bakaba bagiye kubikirwa imbehe.

U Rwanda ni kimwe mu bihugu byitabiriye kandi runashora imari mu ikoranabuhanga kuva mu mwaka w’2000, aho rwashyizeho gahunda zitandukanye za leta zishyurwa zikanasabwa hifashishijwe ikoranabuhanga.

Ku kibazo cy’ubunyangamugayo bucye kigaragara muri serivisi z’ubucuruzi, ngo ni kimwe mu biri ku isonga ikoranabuhanga rigiye gukemura.  Mu kiganiro kuri uyu wa gatatu taliki ya 12 gashyantare 2020 Rwandanews24 yagiranye n’umuyobozi w’igenamigambi, Igenzura n’Ikurikiranabikorwa muri Minisiteri y’Ubucuruzi n’Inganda Bwana Munyurangabo Jonas, atangaza ko bashyize imbaraga mu bucuruzi bwifashishije ikoranabuhanga.

Yagize ati: ubucuruzi bwifashishije ikoranabuhanga rizakomeza kudufasha byinshi kuko twaratangiye kandi turakomeje. Murabizi zimwe muri gahunda za leta ubu zishyurwa binyuze mu ikoranabuhanga; urugero kwishyura imisoro, kwishyura ibyangomwa birimo n’ibyangombwa byo kujya mu mahanga no gusaba ibyangomwa birimo iby’amavuko, indangamuntu n’ibindi.”

Yakomeje avuga ko ikibazo kigaragara mu bucuruzi kirimo kunyereza imisoro no gushaka indonke mu baturage bitazongera kuko umuntu azajya yishyura igiciro cyuzuye ntayo kurenzaho.

Umuyobozi w’igenamigambi, Igenzura n’Ikurikiranabikorwa muri Minisiteri y’Ubucuruzi n’Inganda Bwana Munyurangabo Jonas

Umunyamakuru wa Rwandanews24 amubajije niba ubukungu butazahungabana bitewe n’iki cyorezo cya coronavirus kiri mu bushinwa cyaje gihurirana n’iminsi y’ibiruhuko mu Bushinwa, Munyurangabo yasubije ko Guverinoma n’Urwego rw’abikorera (PSF) barimo gukorana ibiganiro ngo harebwe icyakorwa ngo bitazahungabanya ubukungu bw’u Rwanda.

N’ubwo iri koranabuhanga mu bucuruzi rikataje, impuguke mu by’Ubukungu z’ikigo Economy Polisi Research Network (EPRN) zo zivuga ko hari impungenge z’uko umubare w’abashomeri ushobora kuziyongera kuko abajyaga bakora iyo mirimo bazabura akazi bitewe n’uko buri muntu azajya yikorera serivisi ku giti cye bidasabye uwo kumufasha.

Mu Rwanda  hamaze kugera ibigo bitandukanye bifasha abantu gukora ubucuruzi hifashishijwe ikoranabuhanga, ndetse n’amabanki akaba yaramaze gushyiraho izi serivisi zorohereza abaturage kohererezanya amafaranga, kugura no kwishyura binyuze mu ikoranabuhanga.