December 3, 2021

Rwandanews24

Publishing Factual, verified and accurate stories

Umunyarwanda wari ufungiye mu kigo cya gisirikare I Mbarara umurambo we wasanzwe inyuma y’ibitaro

YASUWE 57 

Umunyarwanda witwa Emmanuel Magezi bivugwa ko yafashwe n’Urwego rushinzwe iperereza mu gisirikare cya Uganda (CMI) yaguye mu kigo cya gisirikare kiri mu Karere ka Mbarara, umurambo we ukaba wasanzwe inyuma y’ibitaro Butabika.


Amakuru avuga ko uyu Magezi yafashwe muri Werurwe 2019, afungirwa mu kigo cya gisirikare cya Makenke mbere yo kujyanwa ku biro bikuru bya CMI biri i Mbuya mu Mujyi wa Kampala.

Umunyamategeko we, Eron Kiiza kuwa 31 Mutarama 2020 yari yasabye ko umukiriya we yaburanishwa. Yasabye ibisobanuro Leta n’igisirikare ku mpamvu umukiriya we yafungwa amezi 10 nta cyaha na kimwe araregwa.

Byari byitezwe ko ubusabe bwa Eron buzasuzumwa kuwa Mbere utaha gusa ngo yaje kwakira amakuru ko Magezi yapfuye nk’uko Daily Monitor ibitangaza.

KWAMAMAZA

Kopi y’urwandiko umuyobozi ushinzwe kugenza ibyaha kuri sitasiyo ya polisi ya Butabika yemeje ko Magezi yapfuye kuwa 21 Mutarama 2020 mu Bitaro bya Butabika aho yari mu gice cyitwa Kirinya.

Umuvugizi wa Polisi mu Mujyi wa Kampala, Patrick Onyango yemeje aya makuru.

Yagize ati ” Nabajije bambwira ko iyo baruwa ari yo. Umurambo wa Magezi wagaragaye hanze y’Ibitaro bya Butabika. Ni ho twawusanze ubwo bari baduhamagaye. Sindamenya ibyabaye, dutegereje raporo.”

Umuvugizi w’ikigo cya gisirikare cya Makenke, Maj. Charles Kabbona yavuze ko azatangaza “amakuru make” afite kuwa Kabiri w’icyumweru gitaha taliki ya 11 Gashyantare 2020.

Umuvugizi w’Igisirikare cya Uganda (UPDF), Brig. Gen. Richard Karemire yanze kugira icyo atangaza kuri iki kibazo. Yabwiye Daily Monitor ko nta cyo abiziho.

Urupfu rwa Magezi rushobora gukoma mu nkokora intambwe yari imaze guterwa hanozwa umubano w’ibihugu byombi.