December 1, 2021

Rwandanews24

Publishing Factual, verified and accurate stories

Gasabo: Umuturage yandikiye Perezida amusaba kurenganurwa ashinja abayobozi kumwaka ruswa

YASUWE 77 

Musabyimana Jacqueline ni umuturage utuye mu Mudugudu wa Hanika, Akagari ka Nyamabuye, Umurenge wa Gatsata mu Karere ka Gasabo, Umujyi wa Kigali, yandikiye umukuru w’igihugu amusaba kurenganurwa, aho ashimangira ko abayobozi bagiye bamubeshya ko agiye guhabwa inzu mu batishoboye ariko akisanga zahawe abandi.

Ni umupfakazi, uyu mubyeyi akaba yarasigiwe abana batatu n’umugabo we waje kwitaba Imana we ari kwa muganga yabyaye, uyu mubyeyi avuga ko kubera kubura ubushobozi umugabo we yashyinguwe n’ibitaro.

Inshuro ya mbere ubuyobozi bw’Umurenge wa Gatsata ngo bwaramujyanye bumwereka inzu ngo yagombaga guhabwa nk’utishoboye ndetse ngo banayimufotoreraho, ariko ngo ihabwa undi. Ashimangira ko yatswe na ruswa ariko ntiyayitanga kubera kubura ubushobozi. No ku nshuro ya kabiri nabwo ngo yizejwe kuyihabwa nabwo biba nka mbere.

KWAMAMAZA

Yandikiye inzego zitandukanye kugeza n’ubwo yageze ku rwego rw’umuvunyi ndetse na Perezidansi asaba kurenganurwa. Ubu inzu abamo yishyurwa n’Umurenge,  ariko akavuga ko afite impungenge ko yazamugwa hejuru ndetse ko na nyiraho ubu arimo kuyimusohoramo bitewe n’uko itarishyurwa. Umurenge uyimwishyurira ibihumbi 15 by’amafaranga y’u Rwanda.

Mu gushaka kumenya icyo ubuyobozi buvuga kuri iki kibazo cya Jacqueline, ku murongo wa Telefoni, Umunyamabanga Nshingwabikorwa w’Umurenge wa Gatsata, Iyamuremye Francois, avuga ko bakizi ndetse ko bategereje ko ubushobozi buzaboneka uyu mubyeyi akaba yahabwa inzu.

Ashimangira ko atari we ubabaye cyane kurusha abandi bafashwa, agahakana ibya ruswa avuga ko abayobozi bagiye bamwaka ngo ahabwe iyi nzu. Ati “Bamusubije ko mu gihe afashwa n’umurenge agomba gutegereza igihe inzu izabonekera akazayijyamo, inzu ntabwo ari ikintu uvuga ngo mpereza, ntabwo iba iri aho kuko ntabwo yuzuriraho kandi kubakira abatishoboye bijyana n’ubushobozi “.

Mu gihe uyu mubyeyi avuga ko n’iyi nzu akodesherezwa ishobora kumushyira mu byago n’abana be, uyu muyobozi aragira ati ” Yayivuyemo se!  Yavuga ngo ndashaka kujya ahandi hano ntihanguye neza”.