December 1, 2021

Rwandanews24

Publishing Factual, verified and accurate stories

Umunyamakuru Phocas Ndayizera yisubiyeho ahakana ibyaha aregwa avuga ko yabyemeye kubera iyicarubozo yakorerwaga

YASUWE 84 

Umunyamakuru wigenga  Phocas Ndayizera akomeje guhakana ibyaha byose aregwa kuko ngo bwa mbere yabyemeye bitewe n’iyicarubozo yari yakorewe.

Urukiko ruburanisha ibyaha byambukiranya  imipaka n’ibyiterabwoba rwa Nyanza kuri uyu wa kabiri taliki ya 7 Mutarama rwatangiye kuburanisha mu mizi urubanza rwa Phocas Ndayizera.

Ndayizera yabwiye urukiko ko yemeye gushyira umukono ku nyandikomvugo zimushinja uruhare mu byaha by’iterabwoba kubera ’iyicarubozo’ yakorewe.

Ashinjwa kuba ku isonga y’itsinda ry’abantu 12 nabo baregwa ibyaha nk’ibye. BBC yatangaje ko uyu munyamakuru aba biswe abaregwa ibyaha nk’ibye ari ubwa mbere ababonye.

Ubushinjacyaha burega Ndayizera na bagenzi be ’umugambi wo gusenya inyubako za Leta’ mu rwego rwo kwerekana ko igihugu kitarimo umutekano.

Mu rukiko i Nyanza, Phocas Ndayizera (ubanza imbere iburyo) areganwa           n’abandi 12 gutegura iterabwoba                                                                  

Ubushinjacyaha bwahawe ijambo mbere bwareze Phocas Ndayizera wigeze kuba umunyamakuru wigenga (stringer), n’abo bareganwa 12 kuba mu mugambi w’iterabwoba rigamije guhungabanya umutekano w’igihugu.

Buvuga ko Phocas yari akuriye itsinda ryo mu Rwanda ryahabwaga amabwiriza n’uwitwa Cassien Ntamuhanga uburanishwa nk’udahari kubera ko atari mu Rwanda.

Ubushinjacyaha bwavuze ko Ndayizera yafatanywe ibiturika byitwa ’Dynamites’ byagombaga kwifashishwa mu gusenya inyubako za Leta nk’ibiraro, inkingi z’amashanyarazi ndetse n’ibigega by’ububiko bw’ibikomoka kuri peteroli.

Ubushinjacyaha kandi bwongeyeho ko ngo ibi biturika byari byoherejwe na Ntamuhanga.

Ndayizera kandi aregwa gushakisha itsinda ry’abagombaga kumufasha barimo uwitwa Eliakim Karangwa, impuguke mu by’ikoranabuhanga wagombaga guteranya ibi biturika ngo bigere ku mugambi wabyo.

Urukiko rwabajije ubushinjacyaha uko bwemeza ko ibyafashwe byagombaga guturitsa inyubako za Leta kandi hatarakozwe igenzura ry’impuguke muri uru rwego.

Byavuzwe ko ibyafashwe byashyikirijwe Ministeri y’ingabo ngo ibigenzure, hakaba hashize umwaka urenga icyegeranyo kitaratangazwa.

Kwemera kubera iyicarubozo

Mu kwiregura, Ndayizera yahakanye inyandiko zose zakozwe mu gihe cy’ubugenzacyaha.

Anavuga ko yemeye kuzishyiraho umukono kubera ibikorwa by’iyicarubozo yakorerwaga.

Yavuze ko azi Ntamuhanga bakiri bato ndetse n’igihe yakoraga umwuga w’itangazamakuru. Ahakana imikoranire iyo ari yo yose igamije gukora icyaha.

Uretse Karangwa Eliakim, yavuze ko bari batangiranye imishinga y’ishoramari rishingiye ku ikoranabuhanga, Ndayizera yavuze ko abandi bagize itsinda ry’abaregwa yababonye bwa mbere mu rukiko.

Bwarinze bugoroba nta wundi ubonye umwanya wo kwiregura, urubanza rukaba ruzakomeza ku  italiki ya 5 Gashyantare 2020.