Abakunzi ba Basketball mu Burundi no mu Rwanda babajwe no kwumva urupfu rwa Florence Sifa Kalume bahimbaga Dada, umukobwa wari ufite ubuhanga bwinshi mu mikino ya Basketball ndetse na football.
‘Dada’ yari afite imyaka 32 na 1,70m z’uburebure, yavukiye i Bujumbura, mu myaka ishize yatangaje ko yatangiye gukina Basketball mu 2004 abyinjijwemo n’incuti yiwe.
Valery Manirakiza, umukuru w’ikipe Gladiators yahoze yitwa Berco Stars avuga ko ikipe ye yababajwe n’urupfu rwa Kalume Florence rwabaye ejo mumpanuka y’akazi aho yakoreraga.
Mu butumwa yahaye BBC, umukuru w’iyi kipe Gladiators, avuga ko Dada yari umwe mu bakinyi b’abakobwa bakomeye cyane Uburundi bwagize.
Avuga ko Florence Sifa yahitanywe n’impanuka y’akazi , icyo mu gifaransa yise ‘traumatisme cranien’ muri Reta Zunze Ubumwe za Amerika, aho yari asanzwe aba.
Ati: “Tubuze umwana wacu… Imana imwakire mu bwami bwayo”.
Sifa ‘Dada’ yari nde?
Abakunzi ba basketball mu karere baramuzi nk’umukobwa muto muto wirabura rwose wakundaga guseka cyane hagati mu mukino.
Yari afite ubuhanga cyane mu gutanga umupira (pass) neza cyane, ubuhanga bwe bwamugejeje muri Amerika.
Akiri muto yigaga mu Burundi, yahavuye ajya kwiga no gukina muri Crane High School muri Uganda nyuma y’uko abakuru b’iryo shuri bakunze uburyo akina mu marushanwa y’amashuri yisumbuye mu karere, bakamusaba kuza kwiga no gukinira ishuri ryabo. Yahamaze umwaka umwe asubira mu Burundi.
Igihe yakinaga mu karere yabaye Most Valable Player (M.V.P) mw’irushanwa ry’Uburundi, MVP mu karere ka gatanu ka Africa incuro 2, MVP muri Uganda (2007).
Imyaka myinshi yayimaze muri Berco Stars y’i Bujumbura mbere y’uko mu 2016 ajya gukina i Dallas, Texas, muri Jacksonville College muri Amerika.
Mu 2018 Florence Sifa niho yageze mu ikipe y’abagore ya basketball ya Bearcats ya kaminuza ya Cincinnati avuye muri Jacksonville College aho yatsindaga amanota nibura 17 ku mukino.
Sifa yakiniye Bearcats imyaka nibura itatu imbere y’uko azimangana mu bakinyi b’iryo shuri kaminuza. Ubu ntibyari bizwi neza ko agikina basketball mu ikipe izwi.
