Abashinzwe umutekano muri Repubulika ya Demokarasi ya Congo bataye muri yombi abantu bagera kuri 20, nyuma y’imyigaragambyo yo ku wa gatandatu y’abatavuga rumwe n’ubutegetsi yabereye mu murwa mukuru Kinshasa.
Mu isuzuma ryayo ry’iyo myigaragambyo, polisi ya DR Congo yavuze ko abo bantu 20 barimo abacyekwaho gusenya stasiyo ya polisi ya Kianza y’i Kinshasa.
Amakuru avuga ko abapolisi batatu batawe muri yombi bacyekwaho gukorera ubugome ku bigaragambya no ku mwana.
Polisi yavuze ko abashinzwe umutekano nibura 27 bakomeretse, batatu muri bo bamerewe nabi.
Urubuga Actualite.cd rwatangaje ko umunyamakuru na we yakubiswe n’igico cy’abigaragambya barubiye”.
Mbere yaho, amakuru yavuze ko abapolisi 23 n’abasivile 14 bakomerekeye mu rugomo rwabaye.
Imyigaragambyo yateguwe n’amashyaka ane atavuga rumwe n’ubutegetsi, mu kwamagana ikiguzi kiri hejuru cy’imibereho, umutekano mucye uri henshi mu burasirazuba bw’igihugu no kuba nta mucyo uhari mu myiteguro y’amatora ateganyijwe kuba mu kwezi kw’Ukuboza (12) uyu mwaka.
Hagati aho, Denis Mukwege, watsindiye igihembo cy’amahoro cyitiriwe Nobel, yasabye ko abapolisi amashusho yagaragaje basa nk’abahohotera abigaragambya, ndetse n’umwana wari uri hafi aho, bakurikiranwa kandi bagahanwa nk’uko BBC dukesha iyi nkuru yabitangaje.
Ati: “Dushishikarije abategetsi gutuma habaho iyubahirizwa ry’uburenganzira bw’ibanze bw’abaturage bwo guterana, kuvuga icyo batekereza no kwigaragambya mu mahoro, bw’ingenzi cyane muri sosiyete igendera kuri demokarasi”.
