Nyuma y’uko hirya no hino hasakaye amakuru ko Gen. Buyoni yabuze ndetse bikaza kuba urujijo ubwo hari abavugaga ko yafashwe none Komisiyo yigenga ishinzwe uburenganzira bwa muntu mu Burundi (CNIDH), yatangaje ko Gen. Alain Guillaume Bunyoni wahoze ari Minisitiri w’Intebe afunze kandi yabonanye na we aho afungiye.
Ku mugoroba wo kuri uyu wa Gatanu nibwo amakuru yatangiye guhwihwiswa ko Bunyoni yafatiwe muri ‘Bujumbura Rural’ aho yari amaze igihe yihishe.
Ku wa Gatatu ariko Minisitiri w’Umutekano mu gihugu, Martin Niteretse yari yabwiye itangazamakuru ko batazi aho Bunyoni aherereye, ko Ubushinjacyaha Bukuru burimo kumushakisha ariko ntiyasobanura ibyo aregwa.
Mu butumwa CNIDH (Commission Nationale Indépendante des Droits de l’Homme du Burundi) yanyujije kuri Twitter ku mugoroba wo kuri uyu wa Gatandatu yemeje ko yamusuye.
Ubu butumwa buvuga ko “Kuri uyu wa 22 Mata 2023, Komisiyo yasuye Bunyoni hagamijwe kuganira na we, ko ameze neza ndetse nta yicarubozo yigeze akorerwa uhereye igihe yafatiwe, umuryango we ukaba wabimenyeshejwe.”
Gen Bunyoni yahunze amaze amezi umunani akuwe ku mwanya wa Minisitiri w’Intebe, yagiyeho muri Kamena 2020.
