Gisagara: Amapoto yabaye imbogamizi zo kugerwaho n’umuriro

Abaturage basigayemo hagati badafite umuriro w’amashanyarazibavuga ko amikoro macye ariyo yatumye bakomeje kuba mu kizima kubera ko babuze amafaranga yo kugura amapoto yemewe na REG nk’uko babibwiye Rwandanews24.

Umugabo urimu kigero cy’imyaka 50 y’amavuko avuga ko ipoto ihenze kurusha ko yagura imirasire y’izuba nubwo nayo ntayo afite.

Ati: “Nabuze ubushobozi bwo kugura ipoto kuko igiti cyemewe na REG kigura hagati y’amafaranga ibihumbi 15.000frws na 20.000frws. Ntabwo aya mafaranga nayabona ngo nyagure ipoto kandi abana bagiye kuburara cyangwa bambaye ubusa kandi nabwo kuyabona bisaba igihe kinini.”

Akomeza avuga ko bahawe umuriro ariko umudugudu wabo ntiwagera hose kuburyo basigayemo hagati, ariko abona waregerejwe abifite.

Ati: “Ubusanzwe iyo bagiye gushing amapoto bahera ruhande, ariko abayobozi b’imidugudu bahera ku bipangu by’abakire abakene tugasigaramo hagati. Ubashije kubona ubushobozi asigaye agura imirasire, kuburyo amashanyarazi asanzwe azaguma aho yagarukiye bitewe nuko abakene tutabashije kwigondera na kimwe. Leta yadufasha kubona ibiti byemewe kuko nta shyamba tugira twabikuramo.”

Umugore uri mu kigero cy’imyaka 50 y’amavuko we avuga ko batumva ukuntu basigayemo hagati kandi usanga abasigayemo ari abafite amikoro macye.

Ati: “Muzatubarize niba Perezida yaratanze umuriro w’amashanyarazi abifite, abatifite akavuga ngo dusigaremo hagati. Perezida yatanze umuriro ku bakene n’abashaje ngo dusazire ahabona, ariko ntawo twabonye ahubwo batubwira gutanga amafaranga ngo dukunde tubone umuriro. Bazadufashe baduhe amapoto tubone umuriro.”

Mu kiganiro Rwandanews24 yagiranye n’Umuyobozi w’akarere ka Gisagara wungirije ushinzwe iterambere ry’ubukungu Habineza Jean Paul, yavuze ko gahunda yo kugeze umuriro ku baturage igikomeje itahagaze nk’uko aba baturage bavuga ko basigayemo hagati.

Ati: “Muri gahunda ya leta y’imyaka irindwi y’uko abaturage bose bazaba bafite umuriro w’amashanyarazi cyangwa ukomoka ku mirasire y’izuba. Mu karere kacu ubu tugeze ku kigero cya 75% by’abaturage bose bafite umuriro w’amashanyarazi n’ukomoka ku mirasire y’izuba. Urumva ko hasigaye 25% by’abaturage batarabona umuriro, ariko ni igikorwa kigikomeza tuzahuza na 2024.”

Imibare itangwa na EDCL igaragaza ko 68, 2% by’Abaturarwanda bafite umuriro w’amashanyarazi, uyu mubare uzazamuka ugere kuri 74% muri Kamena uyu mwaka.

Kugeza ubu 48, 72% bacana amashanyarazi aturuka ku muyoboro mugari, naho 19, 45% bo bacana amashanyarazi aturuka ku mirasire y’izuba.

Muri gahunda ya Guverinoma y’imyaka irindwi igamije kwihutisha iterambere NST1, biteganyijwe ko mu mwaka wa 2024 abaturarwanda bose bazaba bagerwaho n’amashanyarazi.

Subiza ku gitekerezo

Your email address will not be published. Required fields are marked *