Rutsiro: Abagizi ba nabi bateye abaturage ibyuma mu mutwe

Uwimana Paul uzwi ku izina rya Kayizali wo mu karere ka Rutsiro yatangiriwe n’abagizi ba nabi bataramenyekana baramutemagura none arembeye mu bitaro bya Murunda, n’uwamutabaye nawe arembeye mu kigo nderabuzima, abo mu miryango yabo barasaba ko bahabwa ubutabera ababikoze bagafatwa bakabiryozwa.

Amakuru agera kuri Rwandanews24 avuga ko uru rugomo rwabaye mu masaha ashyira saa sita z’ijoro zo kuri iki cyumweru, tariki 22 Mutarama 2023.

Uru rugomo rwabereye mu mu wa Murenge wa Ruhango, akagari ka Kavumu ho mu mudugudu wa Muhingo.

Uwo mu muryango wa Uwimana waganiriye na Rwandanews24 utifuje ko imyirondoro ye itangazwa yatubwiye ko uyu mubyeyi akeneye ubutabera, kuko aba bamusagariye avuye mu kazi.

Havugimana Etienne, Umuyobozi w’akarere ka Rutsiro wungirije ushinzwe iterambere ry’ubukungu yahamirije Rwandanews24 aya makuru.

Ati “Ahagana saa saa sita z’ijoro, Abagizi ba nabi batamenyekanye batangiriye uwitwa Uwimana Paul ufite imyaka 50 aratabaza, uwitwa Bizimana Evariste ufite imyaka 23 nawe asohotse iwe aje gutabara bose babatera ibyuma mu mutwe no ku maboko barabakomeretsa . Abakomeretse bajyanywe ku kigo nderabuzima cya Kayove, ariko uwitwa Uwimana Paul we yagejejwe ku bitaro bya Murunda ari kwitabwaho n’abaganga.”

Havugimana akomeza avuga ko ababatemye birutse bajya mu mashyamba ya Mushonyi.

Ati “Ntabwo abo bagizi ba nabi bari bamenyekana, kuko abaturage batabaye bo bakiruka bajya mu mashyamba ya Mushonyi, gusa iki kibazo ntitwakirebera hatangiye iperereza kuri iki kibazo.”

Havugimana akomeza asaba abaturage kwirinda ingendo z’igicuku kinishye, igihe hari impamvu ituma bagenda si byiza ko umuntu yagenda wenyine.

Ati “Turihanganisha Uwimana Paul wahuye n’ibibazo, kandi turasaba abaturage gukomeza gukaza amarondo kuko n’imwe mu ngamba zidufasha twese kwibungabungira umutekano.”

Uwimana Paul uzwi ku izina rya Kayizali arembeye mu bitaro bya Murunda nyuma yo guterwa ibyuma n’abagizi ba nabi bataramenyekana

Subiza ku gitekerezo

Your email address will not be published. Required fields are marked *