Gisagara: Bahangayikishijwe n’itsinda ry’insoresore ryambura abantu ku manywa

Abatuye mu kagali ka Rwanza bavuga ko bahangayikishijwe n’ikibazo cy’ubujura bukorwa n’itsinda ry’insoresore zambura abantu ku manywa y’ihangu kuburyo nta muntu ukigenda mu muhanda wa Cyezuburo – Rwanza ari umwe nk’uko babibwiye Rwandanews24.

Umugore uri mu kigero cy’imya 45 yagize ati: “Abajura mu mudugudu wa Cyezuburo mu kagali ka Rwanza baratuzengereje kuburyo bigeze no kuhashyira abapolisi ariko nabo barananiwe ntibagaruka. Ni abasore bakiri bato ntabwo aria bantu bakuru, ni uko bigize ibihazi kandi baba bafite ibyuma niyompamvu biduteye impungenge.”

Uyu mugore akomeza avuga ko hari ubwo bakora umukwabu w’umutekano bakabafunga, ariko ntabwo bahashira. Ati: “Bakunze kubafata bakabafunga, ariko havuka abandi niyompamvu batahashira. Ikindi ni uko abo batwaye hashira igihe gito tukabona baragarutse bakaza bafite ubugome buruta ubwa mbere.”

Abaturage bavuga ko ntawatinyuka kunyura muri uyu muhanda Cyezuburo_Rwanza ari umwe kubera ubujura buhakorewa

Umugabo uri mu kigero cy’imyaka 55 y’amavuko, we avuga ko hakenewe abashinzwe umutekano bahoraho kuko iki gishanga cya Cyezuburo gihuza akarere ka Huye n’aka Gisagara gikabije kuba isenga y’amabandi.

Ati: “Keretse bahashyize abasirikare bahoraho kuko abapolisi barananiwe ntibagaruka. Mu minsi ikurikira ubunani baherutse kuhamburira umucuruzi wari ujyanye inyanya ku isoko mu Rwanza. Baramwubikiriye arimo gucunga kuko hazamuka, bamukubita ikibando agwa hasi baterua igare n’igitebo giteretseho barabyirukankana. Ntabwo twamenye irengero ryabyo ntituzi niba yaranabibonye.”

Abajijwe niba abahinzi baba bari mu gishanga impamvu badataba uwo babonye usumiriwe n’amabandi, yagize ati: “Mbere twabanje kujya dutabarana, ariko ntitukibikora kuko iyo ugiye gutabara bakurwara inzika bakagutegera mu nzira bakakugirira nabi. Hari abo byabayeho kenshi duhita tubireka. Noheli yegereje hari umusore wasanzwe mu muferege yapfuye kandi byagaragaraga ko afite ibikomere nk’uwishwe. Ntitwigeze tumenya icyamwishe kuko bamujyanye kwa muganga ngo babisuzume ariko ntakindi twamenye. Urumva ko aha hakenewe umutekano byihariye.”

Bavuga ko mu bihe byashize higeze gushyirwa Abapolisi, ariko baragiye ngo ntibagaruka

Mu kiganiro Rwandanews24 yagiranye n’Umuyobozi w’Akarere wungirije ushinzwe Ubukungu Habineza Jean Paul, yavuze ko ikibazo cy’ubujura bukorerwa mu kagali ka rwanza bakizi ndetse ko bashyizeho ingamba zo kugikumira.

Ati: Mu gihe cyashize hari abantu bahakoreraga urugomo, ariko twashyizeho irondo ry’umwuga rihoraho ntabwo hakiri abajura. Abaturage bumva ko umutekano ucungwa n’abapolisi n’abasirikare, ariko ntabwo haboneka abapolisi bakwiriye ahantu hose. Irindo ry’umwuga rirahari kandi iki kibazo cyarakemutse ntabwo kigihari nk’uko babivuga.

Igishanga cya Cyezuburo giherereye mu kagali ka Rwanza, Umurenge wa Save mu karere ka Gisagara, kikaba gihana imbibe n’umurenge wa Mbazi wo mu karere ka Huye.

Subiza ku gitekerezo

Your email address will not be published. Required fields are marked *