Muri Afrika y’Epfo hagaragaye ubwoko bushya bw’icyorezo cya Covid buzwi nka XBB.1.5 bwandura vuba cyane nk’uko byagaragaye mu bwongereza na Amerika aho imaze imisni yiganje.
Ibi byatumye Perezida Cyril Ramaphosa wa Africa y’Epfo afata icyemezo cyo gukoranya inama kuri uyu wa kabiri taliki ya 10 Mutarama 2023, ikaba iribwitabirwe n’abagize National Coronavirus Command Council ngo bige ku bwoko bushya bwa Covid bwabonetse muri iki gihugu muri iki cyumweru.
Ubu bwoko buzwi nka XBB.1.5 bumaze kuboneka kandi mu Bwongereza, no muri Amerika aho bwabonetse mbere kandi bwiganje.
XBB.1.5 ni ubwoko bwa Covid buva ku bwamenyekanye cyane ku isi bwa Omicron kandi bwandura vuba cyane.
Ramaphosa kuwa mbere yemereye abanyamakuru ko iyi nama ya none iri bubeho ariko asaba abatuye iki gihugu kudakangarana.
Yabwiye Eyewitness News ati: “Tugomba gufatirana vuba tugakora iyi nama ejo, nyuma hari amakuru azatangarizwa igihugu.”
Yongeyeho ati: “Bamwe bavuze ngo ‘ese tugiye kugira ibyo tubuzwa, guma mu rugo n’ibindi byose?’ – Icyo dushaka ni ukugira amakuru ku birimo kuba kuri ubu bwoko bushya.”
Mu cyumweru gishize abahanga bo muri OMS/WHO bemeje ko XBB.1.5 kugeza ubu ifite “ingufu zo gukura” kurusha andi moko mato yose ya Covid.
Africa y’Epfo yagize abantu barenga miliyoni eshatu banduye Covid-19 – umubare wo hejuru kurusha ibindi bihugu byose muri Africa.
