Ubukene bunuma mu Ikipe ya Rutsiro FC, bwayiteye gutandukana n’abakozi 8

Ubuyobozi bw’ikipe ya Rutsiro FC buvuga ko ubukene buyugarije bwatumye itandukana n’abakinnyi 6 ndetse n’abakozi 2 basanzwe bakora mu bijyanye n’icungamutungo.

Abarimo Uwizeye Florence na Uwizeye Divine basanzwe ari abakozi b’ikipe ya Rutsiro FC mu ishami ry’icungamutungo biravugwa ko bahawe amabaruwa abahagarika nyuma yo kubura ubushobozi bwo kubahemba.

Abakinnyi 6 barimo Nshimyumuremyi Olivier, Uwizeye Ortega, Mutabazi Jean Claude, Bakundukize Innocent, Nsanzingomayijuru Adolphe na Nijyimbere Abdoulkalim nibo batandukanye n’iyi kipe yo mu karere ka Rutsiro.

Nsanzineza Ernest, Perezida w’ikipe ya Rutsiro FC yahamirije Rwandanews24 aya makuru.

Ati “Nibyo koko hari abakozi 8 twandukanye barimo abakinnyi n’abandi basanzwe mu micungire y’ikipe, ibi byose bikaba bikomoka ku mikoro y’ikipe adahagije muri iki gihe. Byadusabye ko tuvugurura amasezerano kuko hari ibyo bari basanzwe bemererwa twasanze tutakomeza kubabonera byatumye dutandukana nabo.”

Nsanzineza akomeza avuga mbere yo gusesa amasezerano y’abakozi babanje kuganira kuko abakinnyi bari batararangiza amasezerano yabo, bakaba babahaye uburenganzira bwo kwishakira andi makipe bajye gukinamo.

Rutsiro FC idahagaze neza yongereyemo amaraso mashya barimo abakinnyi babiri bongerewemo barimo umunyarwanda n’undi ukomoka mu gihugu cy’u Burundi ngo bayifashe muri aya mezi atandatu asigaye y’imikino yo kwishyura.

Amakuru Rwandanews24 ifite n’uko kubera ubukene bunuma muri iyi kipe yavukiye I Kayove ikaba yakirira imikino yayo kuri sitade Umuganda abakozi bayo baberewemo ibirarane by’amezi abiri, mu gihe abakinnyi bo nta kirarane na kimwe baberewemo.

Binyuze mu matora y’inteko rusange y’ikipe ya Rutsiro FC, yateranye kuwa gatatu, tariki 17 Kanama 2022 nibwo Nsanzineza Ernest yatorewe kuyobora iyi kipe asimbuye kuri uyu mwanya Nsanzimfura Jean Damascene wari usoje manda y’imyaka 4 akaba ikipe barayisanganye amadeni akabije yaba ku bakinnyi ndetse n’abakozi arenga Miliyoni 80.

Mu mwaka w’imikino 2021-2022 Rutsiro FC yaje ku mwanya wa 14 mu gihe bifuzaga kuza mu myanya y’imbere, nk’uko mu mwaka wabanje bari baje ku mwanya wa 6.

Akarere ka Rutsiro mu mwaka wa 2021/2022 kari kageneye ikipe ya Rutsiro FC ingengo y’imari ya miliyoni 90 ariko bayongereye andi umwaka urangira gatanze miliyoni 170, mu gihe ikipe yari yifuje ingengo y’imari ya milioni 380 frw kugira ngo ikipe ikore neza.

Abakinnyi batandukanye na Rutsiro FC yabifurije amahirwe masa no guhirwa n’urugendo rushya

Subiza ku gitekerezo

Your email address will not be published. Required fields are marked *