Rubavu: Baratabariza Mukakabera wasohowe mu nzu yari amazemo imyaka 20

Mukakabera Louise n’umubyeyi wo mu karere ka Rubavu wasohowe munzu n’ubuyobozi bw’umurenge yari atuyemo imyaka 20, abaturanyi bakaba bavuga ko ibyo yakorewe yatsikamiwe n’amafaranga.

Mukakabera yasohowe muri iyi nzu kuri uyu wa 05 ukuboza 2023 mu masaha ashyira saa sita n’igice, mu murenge wa Gisenyi, akagari ka Mbugangari ho mu mudugudu w’ihumure.

Nizeyimana Mussa, avuga ko ibyakorewe uyu mubyeyi ari akarengane gaturuka ku kuba atarize.

Ati “Aka ni akarengane kuko uriya mukecuru ntabwo yize, twabonye amacenga yabayemo hano y’abayobozi, I parcel ayisigaranye imyaka 20 none nk’abantu baba hanze bamusabye icyangombwa cy’ubutaka ngo bamuvugururire inzu birangira bagihinduje, ariko nk’umuntu utarize yakomeje kwicara atazi ibyabereye mu butaka.”

Nizeyimana akomeza avuga ko huti huti yo kuba umukuza munzu afite ubushobozi nibyo byabayeho bituma asohorwa munzu shishi itabona, ngo bamuhaye ayo gukodesha inzu amezi arindwi kugira ngo bamwikure mu maso.

Nyiramana Clenie ati “Twamuherekezaga kenshi ku buyobozi ngo tubuhamirize ko aho atuye ari kwa papa we, abavandimwe natwe nk’abagabo twaramusinyiye ariko haciyemo igihe abona message ivuga ko yatanze amakuru mabi, yajya kwa mudugudu akabura aho ahera amufasha amubwira ko bamuhereye hejuru, na gitifu w’umurenge yadusabaga ku mubwira ngo asohoke tukamwihorera.”

Nyiramana akomeza avuga ko kuba abamuhaye amezi 7 ngo ajye gukodesha ari ukwikiza kuko nyuma y’ayo mezi n’ubundi azakomeza gusembera, tukaba dusanga ubuyobozi bwamurenganyije.

Mukakabera Louise, wasohowe munzu asanga ari akarengane yagiriwe agasaba ko yarenganurwa agahabwa ubutabera.

Ati “Aha mpamaze imyaka 20 kandi papa yahasigiwe na Vumulia wagiye muri America kubw’amahirwe make yitaba Imana, nyuma abo mu muryango baraje baradushuka ngo bagiye kutuvugururira inzu tumuha icyangombwa cy’ubutaka ahita ajya kugihinduza. Ubuyobozi bunkuyemo ngo buzanyubakira buntuze kuki butamvanyemo bwaramaze kunyubakira.”

Mukakabera akomeza avuga ko nyuma yo kwakwa icyangombwa cy’ubutaka hakoreshejwe ruswa hagahindurwa icyangombwa cy’ubutaka atabizi, ndetse umurenge kuba waragiye umutuma ibyangombwa ngo umuhe icya burundu atungurwa no kuba yarabwiwe ko yatanze amakuru mabi kandi atariwe warebaga muri sisitemu.

Mukakabera akomeza avuga ko muri 2019 uwari gitifu w’umurenge na DPC bari bahari aribo babashije kumugarura muri iyi nzu kuko yari yayisohowemo nk’umurozi, ibyo afata nk’ihohoterwa ndetse akaba atarabashije kugera kuri mayor w’akarere ngo amutakambire kuko umukozi w’akarere yageragayo akamukumira ku mugeraho.

Me. Munyentwari Maurice kuri iki kibazo avuga ko ibyo ubuyobozi bw’umurenge bwakoze byubahirije amategeko.

Ati “Nshingiye ku itegeko rigena izungura kuba nyir’ubutaka nta mwana yasize, akaba nta mubyeyi afite n’ukuvuga ko abavandimwe be aribo bakurikiraho mu kuzungura (musaza) we ari nawe wahahawe yemewe n’itegeko.”

Me. Munyentwari akomeza avuga ko ubuyobozi bw’umurenge ndetse n’abagize uyu muryango bashobora kwicarana bagashaka uko yafashwa, kugira ngo na none ntajye gusembera.

Tuyishime Jean Bosco, Umunyamabanga nshingwabikorwa w’umurenge wa Gisenyi nawe ahamya ko gusohora Mukakabera muri iyi nzu bashingiye ku itegeko rigena abagomba kuzungura umuntu utakiriho.

Mukakabera wasohowe munzu amakuru Rwandanews24 yamenye n’uko arimo gusemberana n’abana be.

Inyandiko yahawe Mukakabera n’ubuyobozi bw’murenge nyuma bukamusubiza ko yatanze amakuru atari yo
Abantu bari benshi bashungereye uburyo Mukakabera n’urubyaro rwe basohorwa munzu

Subiza ku gitekerezo

Your email address will not be published. Required fields are marked *