Rubavu: Umugabo afunzwe akekwaho kwica mushiki we akamushyingura

Umugabo w’imyaka 45 wo mu karere ka Rubavu we n’abandi batatu bakekwaho kumufasha kwica mushiki we bakamushyingura, bakanahahinga bikamenyekana, batawe muri yombi.

Ibi byabereye mu murenge wa Nyamyumba, akagari ka Kinigi, ho mu mudugudu wa Karambi mu ijoro ryahise ryo kuri uyu wa 03 ukuboza 2023.

Mulindangabo Eric, umunyamabanga nshingwabikorwa w’umurenge wa Nyamyumba yahamirije Rwandanews24 aya makuru.

Ati “Nyirabuhinja w’imyaka 47 birakekwa ko yishwe na musaza we afatanyije n’abandi bagabo 3 aho bapfaga ko yanze ko agurisha isambu y’umuryango, aho umugabo yashakaga kuyigurisha mushiki we abyanze afata umwanzuro wo ku mwica.”

Mulindangabo akomeza avuga ko nyuma yo kumwica bahise bamushyingura, bakanahahinga nyuma byamenyekana bakabata muri yombi.

Abafashwe kuri ubu bafungiye kuri sitasiyo ya Polisi ya Nyamyumba, mu gihe iperereza rikomeje.

Mulindangabo yaboneyeho gusaba abaturage ngo birinde amakimbirane, kuko iyo wishe umuntu uharanira gusigarana imitungo bikarangira nawe uheze muri gereza, bikaribwa n’abandi.

Mulindangabo yasabye kandi abafitanye ibibazo kugerageza kwegera inzego z’ibanze zikabafasha kuva muri ayo makimbirane.

Ibiro by’akarere ka Rubavu

Subiza ku gitekerezo

Your email address will not be published. Required fields are marked *